Високите температури во текот на летото можат значително да влијаат врз здравјето на бремените жени. Поради физиолошките промени што се случуваат во бременоста, организмот потешко ја регулира телесната температура, а потребите за течности се зголемени. Затоа бремените жени се сметаат за една од поранливите групи за време на топлотните бранови.
Продолжената изложеност на горештини, особено кога е придружена со физички напор и недоволен внес на течности, може да доведе до дехидратација, топлотна исцрпеност и други здравствени компликации кај мајката и плодот.
Покрај општите мерки за заштита од топло време, Институтот за јавно здравје препорачува бремените жени да преземат дополнителни мерки за да го намалат ризикот од прегревање.
Избегнувајте престој на сонце во најтоплиот дел од денот
Најголем ризик постои во периодот од 11:00 до 17:00 часот, кога температурите и УВ-зрачењето се највисоки. Доколку не е неопходно, престојот на отворено треба да се сведе на минимум.
Хидратацијата е клучна
Течности треба да се внесуваат редовно во текот на целиот ден, а не само кога ќе се појави чувство на жед. Водата е најдобар избор, а особено е важно секогаш да имате шише со вода при излегување од дома.
Ако мора да бидете надвор
При неопходен престој на отворено, се препорачува:
- да престојувате во сенка;
- да правите почести паузи;
- да носите лесна, светла и комотна облека;
- да користите капа со широк обод и заштитни очила;
- да имате мобилен телефон за навремено барање помош доколку се појават симптоми на топлотен стрес.
Престојувајте во разладени простории
Кога е можно, бремените жени треба да престојуваат во климатизирани или добро проветрени простории. Дури и неколку часа поминати во разладен простор можат значително да ја намалат изложеноста на топлина.
Најголем ризик постои во периодот од 11:00 до 17:00 часот, кога температурите и УВ-зрачењето се највисоки. Доколку не е неопходно, престојот на отворено треба да се сведе на минимум
Внимавајте на исхраната и физичката активност
Се препорачуваат лесни и почести оброци, богати со овошје и зеленчук, додека тешката и висококалорична храна треба да се избегнува. Исто така, треба да се избегнува продолжен физички напор кој може да доведе до прегревање на организмот.
Не ја менувајте терапијата на своја рака
Секоја препишана терапија треба да се зема редовно, а нејзиното менување или прекинување е дозволено само по консултација со избраниот гинеколог или лекар.
Заштита на бремените жени на работното место
Особено внимание е потребно кај бремените жени кои работат на отворено или во простории со високи температури.
Се препорачуваат лесни и почести оброци, богати со овошје и зеленчук, додека тешката и висококалорична храна треба да се избегнува. Исто така, треба да се избегнува продолжен физички напор кој може да доведе до прегревање на организмот
Што треба да обезбедат работодавците?
Во услови на топлотен бран се препорачува:
- прилагодување на работното време за да се избегне најтоплиот дел од денот;
- прилагодување на работните задачи со избегнување на тежок физички напор и продолжена изложеност на директно сонце;
- почести паузи во разладени или засенчени простории;
- постојан пристап до безбедна вода за пиење;
- добра вентилација и разладување на работните простории;
- информирање на вработените за раните знаци на топлотен стрес.
Алармантни симптоми: кога веднаш да побарате помош?
Бремената жена треба веднаш да се јави кај матичниот гинеколог или да побара итна медицинска помош ако се појават:
- изразена вртоглавица или губење на свеста;
- силна и постојана главоболка;
- покачена телесна температура или топла и сува кожа;
- отежнато дишење;
- забрзана срцева работа;
- конфузија;
- болки во стомакот или контракции;
- значително намалени или отсутни движења на плодот.
Апел до семејствата и работодавците
Институтот за јавно здравје апелира бремените жени, членовите на нивните семејства, здравствените работници и работодавците доследно да ги почитуваат препораките за заштита од топлотен стрес. Навремената примена на овие мерки придонесува за зачувување на здравјето на мајката и плодот и за намалување на ризикот од здравствени компликации за време на топлотните бранови.
(Извор: Институт за јавно здравје на РСМ)
