Во текот на учебната година семејниот живот најчесто има јасен распоред. Се знае кога се станува, кога се оди на училиште, кога е време за домашни задачи, активности, капење и спиење.
Но, кога ќе дојде летниот распуст, многу родители се прашуваат дали треба и понатаму строго да се придржуваат до сите правила или, пак, да им дозволат на децата малку повеќе слобода.
Експертите имаат јасен одговор – летото е создадено за опуштање, а некои правила можат без грижа да се стават на пауза.
- Не мора секогаш да легнуваат рано
Ако следниот ден нема училиште, тренинг или друга обврска поради која треба рано да станат, нема причина децата да мора да си легнуваат во исто време како во текот на учебната година. Тоа не значи дека треба да останат будни до полноќ играјќи видеоигри, туку дека семејната прошетка, дружењето или филмската вечер не мора да завршат само затоа што часовникот покажува девет навечер. Во лето, распоредот може да биде малку пофлексибилен.
- Не мора секогаш да има строги правила околу благо
Секако, тоа не значи дека сладоледот треба да го замени овошјето или домашниот оброк. Но, летото е период кога е сосема во ред понекогаш да се направи исклучок.
Сладолед на плажа, мафин по прошетката или омилен десерт по ручекот нема да ја нарушат здравата исхрана ако генерално детето се храни разновидно. Понекогаш е важно децата да почувствуваат дека не мора сè секогаш да биде совршено.
- Заборавете на реченицата: „Малку повежбај за да не заборавиш“
За многу деца ова е една од најнеомилените реченици што можат да ја слушнат за време на распустот. По цела учебна година исполнета со часови, тестови и домашни задачи, летото треба да биде период кога навистина ќе се одморат.
Доколку сметате дека е потребно малку повторување на материјалот, оставете го за последните недели пред почетокот на новата учебна година.
И тогаш нека биде кратко, без притисок и во периодот од денот кога надвор е премногу топло за игра.
- Не инсистирајте секој оброк да биде во точно определено време
Во текот на учебната година распоредот е строго дефиниран. Појадок пред училиште, ручек во одредено време, вечера навечер. Но, во лето многу деца природно го менуваат својот дневен ритам.
Некои не се гладни рано наутро, други би вечерале подоцна затоа што подолго играат надвор. Најважно е да јадат редовно и разновидно, а не секој оброк да биде во минута точно. И на родителите ваквата опуштеност често им носи помалку стрес.
- Не паничете поради нередот
За децата, нередот често е дел од играта. За возрасните – причина за нервоза. Летото е вистинско време да прифатите дека тревата, калта, сладоледот на маицата или дамките од праска се сосема нормален дел од детството. Облечете им облека што може да се извалка и дозволете им безгрижно да трчаат, да играат и да истражуваат.
Истото важи и за детската соба. Доколку се доволно големи, нека преземат одговорност сами да ја средуваат. Не мора секој лист хартија или секоја боичка на подот веднаш да биде повод за забелешка. И на децата им е потребен одмор. А батериите најлесно се полнат преку игра, слобода и безгрижни летни денови.
