Родителите кои не поставуваат јасни правила и граници можат да им го отежнат на децата развојот на самоконтролата, одговорноста и други вештини важни за зрелоста. Иако и премногу строгата дисциплина може да има негативни последици, доследната структура им помага на децата да научат да го регулираат своето однесување, да прифаќаат повратни информации и да ги сносат последиците од своите постапки.
Според истражувања и терапевти кои се занимаваат со семејни односи, растењето без дисциплина може да влијае врз однесувањето и долго по детството. Еве осум навики што можат да ги развијат возрасните кои растеле без јасни правила и дисциплина.
- Очекуваат сè да им биде достапно
Децата кои растат без јасни правила подоцна можат потешко да се справуваат со ситуации во кои не го добиваат она што го сакаат.
Ако додека растеле не морале да ги прифаќаат последиците од своите постапки, можат да развијат послаба саморегулација и да очекуваат другите да се приспособуваат на нивните желби.
- Се обидуваат да ги поместат границите на другите
Учењето да се почитуваат туѓите граници е важен дел од растењето. Луѓето кои не го научиле тоа дома можат и како возрасни тешко да ги прифаќаат границите на другите.
Наместо да прифатат одбивање или отворено да разговараат за проблемот, можат да се обидуваат да манипулираат со другите.
- Тешко наоѓаат мотивација
Без структура и чувство на одговорност, децата потешко учат дека за остварување на целите е потребен труд.
Затоа, во зрелоста можат да имаат проблеми со мотивацијата, преземањето иницијатива и самостојното извршување на обврските без надворешен надзор.
- Ги одложуваат обврските
Истражување од 2023 година ја поврзало повисоката самодисциплина со помала склоност кон одложување на обврските.
Децата кои не се навикнати на одговорност подоцна можат да имаат послаба самоконтрола и почесто да ги одложуваат задачите кои бараат време и труд.
- Ги занемаруваат сопствените потреби и цели
Децата најдобро напредуваат кога постои рамнотежа меѓу повратните информации и одговорноста.
Без таква структура, подоцна можат да ги одложуваат важните задачи, да ги занемаруваат сопствените потреби и да пропуштаат можности за личен развој и осамостојување.
- Тешко прифаќаат критика
Дисциплината им дава можност на децата да научат да прифаќаат повратни информации и да го менуваат своето однесување.
Ако во текот на растењето немале такви искуства, како возрасни можат конструктивната критика да ја доживуваат како личен напад, наместо како можност да научат нешто и да се подобрат.
- Чекаат другите да ги насочуваат
Луѓето кои додека растеле не морале самостојно да решаваат проблеми можат и подоцна да очекуваат другите да ги потсетуваат на обврските или да им кажуваат што треба да направат.
Ако родителите редовно ги решавале проблемите наместо нив, тие можат да имаат помалку самодоверба кога треба самостојно да се соочат дури и со помали предизвици.
- Ги потиснуваат и избегнуваат тешките чувства
Јасните граници и структурата можат да им помогнат на децата да научат да ги препознаваат своите емоции и да ги контролираат импулсите.
Ако проблематичното однесување никогаш не се коригира, децата можат да пропуштат важна можност да развијат здрава емоционална саморегулација. Како возрасни, тешките чувства можат да ги потиснуваат, да ги избегнуваат или да ги изразуваат импулсивно.
