Децата родени за време на локдаунот поради пандемијата на КОВИД-19 на четиригодишна возраст потешко се концентрираат, ги следат упатствата и ги регулираат своите емоции, покажува нова студија.
Овие деца ја поминале својата прва година од животот во „уникатно нарушени“ околности, бидејќи за време на пандемијата, од 23 март 2020 до 19 јули 2021 година, социјалните контакти биле значително ограничени. Тогашните владини мерки вклучуваа ограничување на контактите со пријателите и семејството, задолжително физичко дистанцирање, носење заштитни маски, како и затворање на групите за бебиња и рекреативните простори.
Истражувачи од City St George’s, University of London анализирале 205 деца родени во Англија за време на првиот локдаун, во периодот од 23 март до 23 јуни 2020 година. Тие утврдиле дека овие деца имаат пониско ниво на извршни функции – клучни когнитивни способности кои овозможуваат планирање, решавање проблеми и приспособување на нови ситуации.
Децата родени за време на локдаунот може да имаат тешкотии да се смират и да останат фокусирани на одредена задача, да ги запомнат или следат упатствата, да не им се одвлекува вниманието и да го приспособуваат своето однесување врз основа на повратните информации
Во трудот објавен во медицинското списание Archives of Disease in Childhood, авторите наведуваат: „Оваа студија ја нагласува потребата од континуирано следење на генерацијата деца родени за време на локдаунот поради КОВИД-19. Можеби ќе бидат потребни дополнителни ресурси за интервенции во училиштата и во семејствата, со цел да се поддржи развојот на извршните функции кај овие деца.“
Ова е првата студија во Англија која опфаќа голем примерок на деца од училишна возраст родени за време на локдаунот. Децата биле директно проценувани со стандардизирани тестови за јазични способности и способности за невербално расудување.
Родителите, исто така, пополнувале прашалници за емоционалната саморегулација на своите деца, работната меморија, способноста за планирање и организирање, самостојното решавање проблеми, како и за нивната фина и груба моторика.
Прелиминарните резултати покажале дека извршните функции, според проценките на родителите и старателите, биле под нивото што било вообичаено пред пандемијата, но и под нивото што би се очекувало врз основа на резултатите на децата за невербално расудување.
Дури една третина од децата биле оценети како деца на кои им е потребна дополнителна поддршка во развојот на извршните функции.
Според истражувачите, резултатите укажуваат дека ограничената разновидност на социјални контакти во најраните години од животот можеби влијаела врз секојдневното функционирање на овие способности. Тоа значи дека овие деца може да имаат тешкотии да се смират и да останат насочени кон одредена задача, да ги паметат или да ги следат упатствата, да не им се одвлекува вниманието и да го приспособуваат своето однесување врз основа на добиените повратни информации.
Кога станува збор за јазичниот развој, резултатите биле понеизедначени. Вкупните резултати за јазичните способности биле на очекуваното ниво или дури и над него за возраста на децата. Меѓутоа, кога истражувачите ги споредиле овие резултати со способностите за невербално расудување, утврдиле дека експресивниот јазик – односно способноста на детето со зборови да ги изразува своите мисли, чувства и идеи – бил послаб отколку што би се очекувало.
Истражувачите претпоставуваат дека рецептивниот јазик, односно способноста на детето да го разбира говорот, можеби бил делумно зачуван благодарение на зголеменото внимание и почестата комуникација од страна на родителите и старателите за време на локдаунот.
Прелиминарните резултати покажале дека извршните функции, според проценките на родителите и старателите, биле под нивото што било вообичаено пред пандемијата, но и под нивото што би се очекувало врз основа на резултатите на децата за невербално расудување. Дури една третина од децата биле оценети како деца на кои им е потребна дополнителна поддршка во развојот на извршните функции
Спротивно на тоа, експресивните јазични способности, односно способноста детето да ги изразува своите мисли и чувства со зборови, можеби биле нарушени поради недостигот од богати и разновидни интеракции со луѓе надвор од потесното семејно опкружување за време на пандемијата.
Истражувачите наведуваат дека моторните способности на децата биле во согласност со очекуваните за нивната возраст кога биле споредени со нормите од периодот пред пандемијата.
Авторите нагласуваат дека станува збор за опсервациска студија, па затоа не може со сигурност да се утврди причинско-последична врска меѓу локдаунот и забележаните разлики во развојот. Едно од ограничувањата на истражувањето е тоа што извршните функции и моторните способности биле проценувани врз основа на извештаи од родителите или старателите, а не со директно тестирање, поради што резултатите можеле да бидат под влијание на субјективната проценка на родителите.
Дополнително ограничување е тоа што учесниците доброволно се вклучиле во истражувањето, иако примерокот опфатил деца од различни демографски, етнички и географски средини низ Англија. Сепак, семејствата што учествувале имале повисоко образовно ниво од просекот на населението во Англија, при што околу три четвртини од родителите имале универзитетска диплома. Тоа можело да придонесе дел од добиените резултати да бидат повисоки од просечните, пишува Дејли мејл.
