Не е непознато дека денес, поголем процент од луѓето нездраво се хранат, а и децата не се исклучок. Со се почестото присуство на ГМО храна, како и лесното и брзо подготвување на готови јадења, брза храна, пецива со адитиви и слично, стануваме жртви на сопствената негрижа за здравјето, и на тој начин и децата ги ставаме во истата позиција.
ЧИПС И ФЛИПС
Чипсот е на самиот врв на омилени детски грицки. Но, она кое не чини е дека тој содржи големи количини на масти, поради фабричката подготовка, како и сол. Многу поздрава варијанта е сами да им го подготвите, и по можност со маслиново масло и со малку сол. Флипсот пак најчесто содржи сол, хидрогенирани билни масто, потенцијален алерген – кикирики или различни зачини во прав и засилувач на вкусот.
ЖИТАРКИ ЗА ПОЈАДОК
Житарките главно се препорачуваат како здрава храна, но некои производи од житарки содржат многу шеќери, а децата токму тие ги бараат и ги сакаат. Истражувањето открило дека дури 50% од оброците од житарки кои децата сакаат да ги јадат за појадок содржат огромни количини шеќер. Препорака на стручњаците е родителите да обрнат внимание на тоа што пишува на декларацијата на “снегулките“ и на децата да им купуваат житарки со количина на шеќер помала од 5 грама на 100 грама производ.
МАЈОНЕЗ
Содржи жолчка и билно масло, а може да има и скроб и зачини, зависно од типот. Нема потреба да се воведува, доволно е децата во исхраната да внесуваат јајца. Постојат алтернативи намази кои може дома да се подготват, како од наут, авокадо…
ВИРШЛИ И КОБАСИЦИ
Процесуираните прехранбени производи кои се прават од свинско и/или говедско месо, а сега и од пилешко месо, масно и сврзно ткиво и дополнителни состојки, не треба често да се наоѓаат на детското мени. Поради нискиот процент на белковии, виршлите и кобасиците не се вбројуваат во нутритивно вреден производ за исхрана на децата, потенцираат истражувачите. Виршлите, кобасиците, како и паштетите, освен што содржат маснотии и други месни состојки кои не се соодветни за децата, содржат и разни конзерванси (нитрати, глутамати) кои може да предизвикаат и алергиска реакција.
СЛАТКИ И ПЕКАРСКИ ПРОИЗВОДИ
Рафинираниот бел шеќер на телото не му дава ниту еден важен нутриент. Сахарозата се наоѓа во намирници како слатки, десерти и сокови, но овој шеќер е скриен и во намирнци како пецива, овошен јогурт и десерти, конзервирано овошје и зеленчук и разни готови супи и сосови (особено кечапот). Пекарските производи пак содржат бело брашно, што значи изобилство на скроб кој дава исклучливо енергија, како и квасец кој може да создаде непријатна надуеност, па затоа е подобро да се земе интегрално пециво или леб за оброк, додека крофните, кроасаните треба да се заменат со домашни бисквити, советуваат лекарите.
