Истражувачите откриле дека бебињата кои биле исклучиво доени во првите шест месеци имале помала веројатност за кратко времетраење на спиењето – дефинирано како помалку од 11 часа сон во текот на 24 часа на возраст од една година – во споредба со бебињата кои биле хранети исклучиво со адаптирано млеко. До овој заклучок дошле по анализата на податоците од 82.918 парови мајка–дете вклучени во националната јапонска студија Japan Environment and Children’s Study.
Кај децата кои добивале комбинација од мајчино и адаптирано млеко, исто така, била забележана помала веројатност за кратко спиење, што укажува дека оваа поврзаност не се однесува само на ексклузивното доење.
„Сè уште е широко распространето мислењето дека доените бебиња спијат помалку, односно дека бебињата хранети со адаптирано млеко спијат подолго“, изјави Јури Накагава од Универзитетот во Тојама, главен автор на студијата, во соопштение за јавноста. „Сакавме да обезбедиме цврсти докази кои ќе ја разбијат оваа заблуда.“
Накагава додаде дека истражувањето нуди уверување против широко распространетото верување дека доените бебиња спијат помалку затоа што мајчиното млеко се вари побрзо. Таа нагласи дека ваквите грижи не треба да ги обесхрабруваат родителите да размислуваат за доењето и неговите бројни добро документирани придобивки. „Светската здравствена организација широко го препорачува доењето, а повеќето луѓе се свесни за бројните здравствени придобивки што ги обезбедува“, изјави Накагава.
Краткото времетраење на спиењето во најраната возраст е поврзано со зголемен ризик од дебелина, проблеми во однесувањето и послаби когнитивни способности подоцна во животот, што го прави соодветниот сон во овој период исклучително важен за здравиот физички и психолошки развој
Истражувачите ги поделиле децата во четири групи: првата група опфатила бебиња хранети исклучиво со адаптирано млеко; втората – бебиња кои биле доени помалку од шест месеци; третата – бебиња кои биле доени во текот на целите шест месеци, но истовремено добивале и адаптирано млеко, и четвртата – бебиња кои биле исклучиво доени во текот на сите шест месеци.
Кога бебињата имале шест месеци, мајките пополнувале прашалници за начинот на исхрана што го применувале. Кога децата наполниле една година, родителите пополниле нов прашалник за тоа колку долго спијат нивните бебиња. Истражувачите се воделе според препораките на американската National Sleep Foundation, која краткото спиење го дефинира како помалку од 11 часа сон дневно.
Веројатност за кратко спиење
Резултатите, објавени во списанието European Journal of Clinical Nutrition, покажале дека кај сите групи бебиња кои примале мајчино млеко веројатноста за недоволно спиење била помала отколку кај врсниците хранети исклучиво со адаптирано млеко.
Веројатноста за кратко спиење кај групата хранета само со адаптирано млеко изнесувала 12,2 %, додека кај бебињата доени помалку од шест месеци таа се намалила на 10,2 %. Кај бебињата кои биле доени во текот на сите шест месеци, но добивале и адаптирано млеко, ризикот се намалил на 9,7 %. Најнизок ризик бил забележан кај бебињата кои биле исклучиво доени во текот на првите шест месеци – само 8,8 %.
Светската здравствена организација препорачува исклучиво доење во текот на првите шест месеци од животот на бебето поради неговите бројни докажани придобивки, меѓу кои се заштитата од инфекции и поддршката на здравиот долгорочен раст и развој
Откако истражувачите ги приспособиле резултатите земајќи ги предвид факторите поврзани со мајката, бебето и животната средина, утврдиле дека бебињата кои биле исклучиво доени шест месеци имале 23 % помала веројатност да спијат пократко од препорачаното во споредба со бебињата хранети само со адаптирано млеко. Подолгото времетраење на доењето исто така било поврзано со постепено намалување на веројатноста за кратко спиење.
Биолошки објаснувања за резултатите
Истражувачите понудиле неколку можни објаснувања за овој феномен. Додека хранливиот состав на адаптираното млеко останува релативно постојан, составот на мајчиното млеко се приспособува на променливите потреби на бебето. Тимот посочува дека мелатонинот – хормон кој помага во започнувањето на спиењето и го подобрува неговиот квалитет – се излачува во мајчиното млеко во текот на ноќта, со што придонесува за воспоставување и регулирање на внатрешниот биолошки часовник и циклусот спиење–будност кај бебето.
Бидејќи новороденчињата произведуваат многу мали количини сопствен мелатонин, внесувањето на овој хормон преку мајчиното млеко може да го поддржи развојот на здрави навики за спиење. Мајчиното млеко содржи и триптофан – аминокиселина што организмот ја користи за создавање мелатонин, а претходни истражувања покажале дека неговата концентрација во мајчиното млеко исто така се зголемува во текот на ноќта.
Сè повеќе докази укажуваат и на улогата на таканаречената „оска црева–мозок“ – комуникациска мрежа што ги поврзува цревните бактерии со функцијата на мозокот. Доењето позитивно влијае врз развојот на здравиот цревен микробиом кај бебињата, а разликите во цревната микробиота помеѓу доените бебиња и оние хранети со адаптирано млеко можат да придонесат за развој на поздрав циклус спиење–будност и подобар квалитет на сонот.
Светската здравствена организација препорачува исклучиво доење во текот на првите шест месеци од животот на бебето поради неговите бројни докажани придобивки, меѓу кои се заштитата од инфекции и поддршката на здравиот долгорочен раст и развој.
Краткото времетраење на спиењето во најраната возраст е поврзано со зголемен ризик од дебелина, проблеми во однесувањето и послаби когнитивни способности подоцна во животот, што го прави соодветниот сон во овој период исклучително важен за здравиот физички и психолошки развој. (Euronews)
