За многу родители, изборот на облека во која бебето ќе спие е извор на стрес. Прашањата како дали на бебето му е премногу топло или студено, дали вреќата за спиење е соодветна и кои се ризиците од прегревање се чести, особено кога станува збор за безбедно спиење на бебињата. Бебињата не можат да кажат како се чувствуваат, а нивното тело сè уште не ја регулира температурата толку ефикасно како кај возрасните.
Сепак, со неколку едноставни насоки за температурата во собата и облекувањето во слоеви, можно е да се обезбеди безбедна и пријатна средина за спиење.
Вреќи за спиење
Главното правило при облекувањето на бебето за спиење е дека едноставноста е најбезбедниот пристап. Изборот на облека ќе зависи од надворешните услови и од тоа колку собата се загрева или разладува во текот на ноќта.
Вреќите за спиење се безбедни „носечки“ прекривки кои го загреваат бебето без ризик да му ја покријат главата. Бидејќи јорганите не се препорачуваат додека детето не порасне, а прекривките треба да се избегнуваат, вреќите за спиење се едно од најпрактичните решенија. Ги има во различни дебелини, прилагодени на различни температури.
Едноделни пижами
Едноделните пижами се облека со ракави и ногавици. Во зависност од температурата, понекогаш ќе бидат доволни само едноделните пижами и вреќата за спиење, додека во други ситуации ќе биде потребно да додадете или отстраните слој облека.
Прекривки
Лекарите советуваат првенствено да се користат вреќи за спиење. Ако сепак морате да користите прекривка, изберете лесна, памучна прекривка со отвори која овозможува циркулација на воздухот. Важно е цврсто да ја подвлечете под пазувите на бебето, така што рацете ќе му бидат надвор од прекривката, за да не се лизне преку лицето.
„Важно е бебето да лежи така што стапалата му го допираат дното на креветчето. Прекривката смее да стигнува само до градите, главата секогаш мора да биде откриена, а рабовите на прекривката треба да бидат подвлечени за да не се поместува. Памучните прекривки со отвори се одличен избор бидејќи материјалот дише“, велат експерите.
Повивање на бебето
Некои бебиња сакаат да бидат повиени, додека на други тоа не им одговара. Препораката е да ја следите реакцијата на детето. Со повивањето треба да престанете штом забележите дека бебето се обидува да се сврти на стомак. Бебето не треба да се повива ако спие во кревет со родителите.
„Бебето мора да биде безбедно повиено за материјалот да не се разлабави и да му го покрие лицето. Користете тенка газа или чаршаф, а не прекривки. Ако го повивате бебето, не користете дополнителна постелнина бидејќи тоа го зголемува ризикот од прегревање“, додаваат тие.
Препорачана температура во собата
Првиот чекор е да ја проверите температурата во собата каде што спие бебето, бидејќи тоа е најдобриот показател за тоа како да го облечете. Собен термометар е најсигурната алатка. Лекарите препорачуваат температурата во собата на бебето да се одржува меѓу 16 и 20 степени Целзиусови.
На таа температура, бебето би требало да носи едноделни пижами и вреќа за спиење со дебелина од 2,5 TOG, но секогаш проверувајте ги и упатствата од производителот на вреќата.
Лекарите советуваат температурата на бебето да ја проверите со допирање на градите или задниот дел од вратот.
„Во ред е кожата да биде топла, но ако е испотена или леплива, на бебето му е премногу топло. Во тој случај отстранете еден слој облека или постелнина. Рацете и стапалата на бебето секогаш ќе бидат постудени на допир, па затоа тие не се сигурен показател – секогаш проверувајте ги градите и грбот.“
Ако градите и грбот се студени на допир, додадете боди под едноделните пижами.
Ако температурата во собата е повисока од 20 степени, обидете се да ја разладите со отворање прозорец или со користење вентилатор, но внимавајте вентилаторот да не дува директно кон бебето. Отстранете еден слој облека или користете потенки едноделни пижами.
Совети за летни и зимски ноќи
Во текот на летото намалете го бројот на слоеви облека бидејќи најчесто е доволен само еден слој. Предност давајте им на лесни и воздушести материјали како памук, како и на лесни вреќи за спиење.
Во зима облечете го бебето во слоеви, на пример боди, едноделни пижами и вреќа за спиење, за топлината да се задржува меѓу слоевите.
Капи и ракавици не се потребни за време на спиењето, а ако користите прекривка, таа треба да биде со отвори и правилно подвлечена.
Како да проверите дали му е топло или студено?
Ако сакате да проверите дали на бебето му е премногу топло, ставете ја раката на неговите гради или на задниот дел од вратот. Ако кожата е жешка, отстранете еден слој облека и повторно проверете по околу десет минути.
Знаци дека на бебето му е премногу топло може да бидат и влажна коса, зацрвенети образи, забрзано дишење и топлотен осип.
Од друга страна, ако градите или грбот на бебето се студени на допир, веројатно му е студено. Можно е да се буди почесто во текот на ноќта, да се буди рано наутро или да спие немирно. Во тој случај, додадете еден слој облека.
