Кога емоциите ќе се засилат, најважно е прво да се намали напнатоста, а дури потоа да се решава проблемот. Психологот и терапевтот Џефри Бернштајн открива три едноставни начини со кои родителите можат да му помогнат на детето полесно да се смири.
Останете смирени кога детето бурно реагира
Бернштајн ги советува родителите да се замислат себеси како термостат што ја одредува „температурата“, а не како термометар што само ја покажува. Кога детето бурно реагира, родителот кој ќе одговори на ист начин може дополнително да ја зголеми напнатоста.
„Ако родителот остане смирен и не се обидува да ја контролира ситуацијата, може да помогне да се намали напнатоста“, објаснува Бернштајн за Psychology Today.
Користете помалку зборови кога емоциите се силни
Родителите во напнати ситуации често почнуваат повеќе да објаснуваат, да приговараат или да држат лекции. Но, детето кое е преплавено со емоции во тој момент не е подготвено да прими толку многу информации. Затоа, Бернштајн препорачува кратки и смирени одговори.
„Гледам дека си вознемирен, да се вратиме на ова подоцна“, е еден од неговите предлози. Како друга можност ја наведува реченицата: „Сакам да го решиме ова, но не додека двајцата сме вака вознемирени“.
Тој нагласува дека целта не е да му се попушти на детето, туку да се избегне дополнително поттикнување на веќе силните емоции.
Прво смирете се, а потоа решавајте го проблемот
Бернштајн смета дека смирувањето и решавањето проблеми се две важни животни вештини и предупредува дека нема многу смисла да се обидувате да решите проблем додека емоциите се на својот врв.
„Намалете го интензитетот, а потоа можете да се посветите на домашната задача, времето пред екран, претераното драматизирање, непочитувањето, анксиозноста, навиките за трошење, барањето работа или кој било друг проблем“, порачува тој.
Додава дека промената на начинот на комуникација може да помогне да се променат дури и обрасците на однесување кои изгледаат длабоко вкоренети.
