Колку често треба да се мијат и чистат предметите што бебињата ги ставаат во уста?

Од цуцлите и играчките до шишињата за хранење – правилната хигиена на предметите што доаѓаат во контакт со бебешката уста е важна за заштита од бактерии и инфекции. Сепак, не е потребно сè постојано да се стерилизира.

На родителите може да им биде предизвик да ја одржуваат чистотата на сите предмети што завршуваат во устата на бебето, од глодалките и играчките до шишињата за хранење. Поради бактериите и остатоците од храна, одржувањето на хигиената на овие предмети е постојана задача. Сепак, зачестеноста на чистењето зависи од начинот на употреба и возраста на детето, а препораките се разликуваат.

Цуцли и играчки

Лажливките често се првата грижа на родителите. Пред првата употреба, цуцлата треба да се преврие или да се измие во машина за миење садови.

Научниците препорачуваат во првите шест месеци од животот на детето цуцлите да се дезинфицираат приближно еднаш неделно. Во периодот меѓу дезинфекциите, како и по наполнети шест месеци, доволно е редовно да се мијат со сапун и вода. Важно е да не се претерува со стерилизацијата бидејќи гумата може побрзо да се оштети.

Глодалките и играчките треба да се измијат веднаш штом ќе се извалкаат, но дезинфекцијата не е секогаш неопходна. Во повеќето случаи, доволни се сапун и вода.

Треба да се има предвид дека хемикалиите можат да оштетат одредени материјали, а постои и ризик бебето да внесе остатоци од средството за чистење во организмот. Најбезбедно е да се следат упатствата на производителот за одржување или да се побара совет од педијатар.

Колку често треба да се чисти приборот за хранење?

Шишињата и нивните делови треба да се мијат почесто од сите други предмети со кои бебето доаѓа во контакт. Американскиот Центар за контрола и превенција на болести (ЦДЦ) препорачува опремата за хранење да се мие по секоја употреба.

Дезинфекцијата е потребна најмалку еднаш дневно ако бебето е помало од два месеца, ако е родено предвреме или има ослабен имунитет.

Откако бебето ќе зајакне и ќе наполни неколку месеци, секојдневната дезинфекција повеќе не е неопходна, но само под услов шишињата темелно да се мијат по секое хранење.

За секој дел правилно да биде исчистен, предметите не треба да се мијат директно во кујнскиот мијалник, каде што можат да се задржат бактерии. Наместо тоа, треба да се користи чист сад со топла вода и сапуница. Секој предмет треба добро да се истрие, темелно да се исплакне и да се остави да се исуши на воздух.

Не се препорачува бришење со кујнски крпи бидејќи и тие можат да бидат извор на зараза. За дезинфекција може да се користи превривање, стерилизација со пареа или благ раствор на белило, исклучиво според соодветните упатства за безбедна употреба.

Не заборавајте на хигиената на бебешките раце

Во устата на бебето најчесто завршуваат неговите сопствени раце. Затоа, важно е со редовното миење на рацете на детето да се започне што порано, за да се создаде навика што ќе го следи во текот на целиот живот.

Притоа, треба да се избегнува топла вода која може да ја иритира чувствителната кожа. Се препорачува миење со млака вода и благ сапун неколкупати дневно.