Многу семејства кои имаат куче забележуваат дека нивните деца поретко се разболуваат, а ново финско истражување нуди научно објаснување за оваа појава. Имено, се покажало дека кучињата во домот внесуваат специфични микроорганизми кои можат да го зајакнат имунолошкиот систем на бебињата и да ги заштитат од болести во текот на првата година од животот.
Одговорот го побарале во домашната прашина
И претходни истражувања покажале дека децата кои растат со куче поретко заболуваат од инфекции и поретко примаат антибиотска терапија, но досега не било јасно што стои зад оваа поврзаност.
За да го откријат одговорот, научници од Финскиот институт за здравје, Универзитетската болница во Куопио и Универзитетот во Источна Финска спровеле истражување во кое учествувале 368 деца.
Истражувачите ги следеле децата уште од периодот на бременоста на мајките, па сè до нивниот прв роденден. Родителите секоја недела воделе белешки за здравствената состојба на своите деца, вклучувајќи ја телесната температура, воспаленијата на увото и други инфекции. Во исто време, научниците анализирале примероци од домашна прашина собрани кога бебињата имале околу два месеца.
Клучни се специфичните микроорганизми
Анализата била насочена кон бактериите и габите кои се поврзуваат со присуството на куче во домот. Резултатите, објавени во списанието Pediatric Allergy and Immunology, покажуваат дека токму овие микроорганизми можат делумно да ги заштитат доенчињата од респираторни заболувања.
Истражувањето покажало дека осум групи микроорганизми поврзани со кучињата се одговорни за 10 до 23 проценти од заштитниот ефект.
Најсилна поврзаност е забележана кај бактеријата Pasteurella, која се поврзува со помал број денови со покачена телесна температура кај бебињата. Дополнително, три сродни групи бактерии објаснуваат околу една четвртина од намалената употреба на антибиотици кај бебињата кои живеат во домови со куче.
Истражувачите нагласуваат дека не е пресудна вкупната количина на микроорганизми. Богатството и разновидноста на бактериите и габите во домашната прашина сами по себе не ги објаснуваат здравствените придобивки. Наместо тоа, клучна улога имаат токму специфичните микроорганизми што кучињата ги внесуваат во домот.
Потребни се дополнителни истражувања
Авторите на студијата заклучуваат дека овие резултати ја потврдуваат важноста на микробната средина во најраната возраст за правилен развој на имунолошкиот систем. Бактериите и габите што ги носат кучињата делумно објаснуваат зошто децата кои растат со домашни миленици се поотпорни на респираторни инфекции.
Сепак, научниците предупредуваат дека и други фактори можат да придонесат за оваа поврзаност. Можно е семејствата кои чуваат кучиња да поминуваат повеќе време на отворено или да имаат поинакви животни навики што позитивно влијаат врз здравјето на децата, а овие аспекти не биле опфатени со ова истражување.
