Во текот на бременоста, жените се соочуваат со многу необични симптоми, а некои од нив добиваат и интересни неформални имиња. Најновиот израз што стана популарен на интернет е „Лего раце“, со кој трудниците ја опишуваат вкочанетоста, отокот и трнењето на дланките и прстите.
Што се „Лего раце“?
Иако не станува збор за медицински термин, „Лего раце“ е назив што многу добро ги опишува симптомите како што се отечени и вкочанети прсти, болка во зглобовите на дланките и чувство на трнење.
Гинекологот д-р Шери Рос објаснува дека жените често создаваат свои називи за симптомите кога медицинските термини, како синдром на карпален канал или едем на шаките, не успеваат доволно јасно да го доловат нивното искуство.
Најчесто, симптомите се најизразени наутро по будењето, кога прстите се вкочанети и потешко се движат.
Зошто се појавуваат?
Според гинекологот д-р Кристин Карлан Гривс, отокот е сосема нормална појава за време на бременоста. Телото создава околу 50 проценти повеќе крв и телесни течности за да го поддржи растот и развојот на бебето. Дел од тие течности се задржуваат во ткивата, што доведува до појава на отоци.
Кога ќе се зголеми притисокот врз нервите во пределот на зглобот, може да се јават симптоми слични на синдромот на карпален канал – вкочанетост, трнење, болка и слабост во дланките и прстите.
Овие тегоби најчесто се појавуваат по 28. недела од бременоста, односно во третото тримесечје.
Кога е потребно да се јавите кај лекар?
Во најголем број случаи, „Лего рацете“ се непријатна, но безопасна појава која исчезнува неколку недели по породувањето.
Сепак, лекарите предупредуваат дека нагло и изразено отекување на рацете, нозете и лицето, особено ако е проследено со силна главоболка, заматен вид, појава на темни точки пред очите или болка во горниот десен дел од стомакот, може да биде знак за прееклампсија – сериозна компликација која бара итен лекарски преглед.
Исто така, ако се појави еднострано отекување на ногата проследено со болка, тоа може да укажува на длабока венска тромбоза, состојба која бара итна медицинска проценка.
Како да ги ублажите симптомите?
Добрата вест е што кај повеќето трудници симптомите постепено исчезнуваат по породувањето.
За олеснување на непријатноста, лекарите препорачуваат:
- да ги држите зглобовите во неутрална положба;
- да носите ортоза за зглобовите во текот на ноќта;
- да избегнувате долго држење на рацете спуштени покрај телото;
- редовно да ги движите дланките и прстите;
- да ставате ладни облоги или да ги потопувате рацете во ладна вода;
- по потреба да користите компресивни завои;
- да го намалите внесот на сол;
- да правите лесни вежби, како стегање и отворање на дланката и кружни движења со зглобовите.
Во потешки случаи, лекарот може да препорача и физикална терапија.
Без разлика дали станува збор за „Лего раце“ или за друг нов симптом, експертите советуваат секоја необична или изразена тегоба во текот на бременоста навреме да се пријави кај матичниот гинеколог, за навремено да се исклучат можни компликации.
