Еден од најдобрите начини за освежување во жешките летни денови се базените. Тие истовремено им овозможуваат на децата да се разладат, да се забавуваат и да уживаат. Но, немаат сите домашен базен, ниту пак во близина имаат јавен или локален базен каде што можат да одат во текот на летото. Затоа, со вас споделуваме 11 идеи кои можат да помогнат летниот ден без базен да биде забавен, интересен и освежувачки за целото семејство. Сè што ви е потребно се малку креативност и неколку ситници што веројатно веќе ги имате дома.
- Направете домашен сладолед
Летото едноставно не може да се замисли без сладолед. Затоа, наместо да одите во продавница и да купите сладолед, направете заедно со децата домашен сладолед со овошје, јогурт или други омилени состојки. Со вклучувањето на децата во подготовката ќе им овозможите да уживаат во самиот процес, а на крајот со задоволство ќе го испробаат своето мало ремек-дело.
- Цртајте со вода по бетон
Цртањето може да помине и без неред, верувале или не. Сè што ви е потребно се кофа со вода, четка за фарбање и бетонска површина. Децата ќе бидат воодушевени кога ќе видат како успеале да го украсат тротоарот или дворот со својот дизајн. Подоцна објаснете им зошто нивната креација исчезнала и предложете им повторно да нацртаат нешто ново.
- Играјте си додавање со мокра топка
На децата кои сакаат игри со топка, овозможете им омилената игра да стане летна, водена забава. Потопете топка во вода и организирајте додавање меѓу членовите на семејството. Освен забава, играта ќе донесе и пријатно освежување во топлиот ден.
- Нека играчките го „измијат“ автомобилот
Земете ги омилените гумени или пластични играчки на вашите деца, неколку сунѓери и кофа со вода. Организирајте мала игра во која играчките „ќе го мијат“ автомобилот, додека децата ќе уживаат во прскањето со вода. А ваша задача е остатокот од автомобилот да го измиете на досега најзабавниот начин.
Земете калапи за сладолед и ставете во нив сезонско овошје. Потоа наполнете ги калапите со вода или домашен сок, оставете ги да се замрзнат и уживајте заедно со децата во освежувањето и вкусот на овошјето. Децата можат да помогнат при изборот и подготовката на овошјето, соодветно на нивната возраст
- Направете водени балони
Водените балони сигурно ќе ги воодушеват децата! Земете балони и наполнете ги со вода. Можете да ги фрлате на безбедно место или да организирате игра во која учесниците ќе се обидуваат да избегнат прскање. Сепак, внимавајте скинатите балони веднаш да се соберат, особено ако во близина има мали деца.
- Играјте игра со сунѓери
Една од наједноставните, но и најзабавните игри во дворот може да биде играта со сунѓери. Потребни ви се сунѓери во различни бои и кофа со вода. Можете да организирате натпревар или едноставно да се прскате со сунѓери натопени во вода и да направите сите да се освежат и забавуваат.
- Направете овошни стапчиња
Земете калапи за сладолед и ставете во нив сезонско овошје. Потоа наполнете ги калапите со вода или домашен сок, оставете ги да се замрзнат и уживајте заедно со децата во освежувањето и вкусот на овошјето. Децата можат да помогнат при изборот и подготовката на овошјето, соодветно на нивната возраст.
- Направете незаборавна забава со лизгање
Подгответе церада и пуштете вода со црево за да се навлажни површината. Потоа забавата со лизгање може да започне. Сепак, бидете особено внимателни со оваа активност. Подлогата мора да биде безбедна, без остри или опасни предмети, испакнатини и дупки. Избегнувајте тврди површини и не користете сапун или други средства што можат дополнително да ја направат површината непредвидливо лизгава.
- Организирајте натпревар во прскање со кофа вода
Во оваа игра е сосема пожелно да учествуваат и возрасните, бидејќи така забавата ќе биде целосна. Поделете се во тимови или едноставно играјте едни со други. Смеата нема да има крај, ќе создадете убави семејни летни спомени и ќе се разладите за време на жештините.
- Организирајте „олимпијада“ со чаши вода
Правилата на играта се едноставни: секој учесник треба да пренесе чаша исполнета со вода од една до друга точка, обидувајќи се да истури што е можно помалку вода. Можете да направите повеќе круга и да изберете победник според тоа кој ќе донесе најмногу вода до целта.
- Направете лов на „богатство“ со вода
Во поголем сад ставете вода и неколку безбедни пластични играчки или предмети што можат да се потопуваат. Децата со помош на пластична лажица, чашка или мала мрежичка нека се обидат да ги „спасат“ предметите од водата. За дополнителна забава, секое пронајдено „богатство“ може да носи нова задача или мал предизвик.
И најважно – безбедноста пред забавата
Без разлика која активност ќе ја изберете, детето треба постојано да биде под надзор на одговорен возрасен кога си игра со вода. Не оставајте дете само во близина на кофа, сад или друга количина вода, дури и ако водата е плитка.
Внимавајте подлогата да не биде лизгава, отстранете ги скинатите балони и малите делови што можат да бидат опасни за најмалите деца и избегнувајте активности на директно сонце во најтоплиот дел од денот. Правете паузи во сенка, понудете им на децата доволно течности и заштитете ги од сонцето со лесна облека, капа и соодветна заштита од сончевите зраци.
Не ви треба базен за летниот ден да биде исполнет со смеа, игра и освежување. Понекогаш се доволни кофа со вода, неколку сунѓери и малку детска фантазија за да создадете незаборавна летна авантура.
