♦♦♦♦♦♦♦
Луѓето со крвна група А би можеле да бидат поподложни на инфекција со коронавирус, додека оние со крвна група О се најотпорни на инфекцијата – ова е заклучокот до кој дошле кинеските научници откако земале и анализирале примероци од крв од 2.173 пациенти заразени со вирусот од три болници во Вухан и Шенжен и ги споредиле податоците со здравата локална популација.
Истражувањето покажало дека лицата со крвна група А, во споредба со другите крвни групи, покажуваат поголема стапка на инфекција и се склони кон развој на потешки симптоми на болеста.
Меѓу 2.173 анализирани примероци на крв се и примероците на 206 пациенти кои починале од Covid-19 во Вухан. Од 206 смртни случаи, 85 од нив биле со крвна група А, а 52 имале крвна група О.
Исто така, и најмногу заразени жители на Вухан (38 проценти) се токму оние со крвната група А, додека 26,4 % од заболените имаат крвна група Б, а 25,8 крвна група О.
За разлика од крвната група А, луѓето со крвна група 0 имаат сигнификантно понизок ризик од зараза во споредба со сите други крвни групи
Научниците предупредуваат дека студијата е само прелиминарна и треба да се направат дополнителни истражувања и да се добијат потврди.
„Луѓето со крвна група А можеби ќе имаат потреба од поголеми мерки на претпазливост за да ја намалат веројатноста од инфекција“, истакнаа истражувачите предводени од Ванг Ксингхуан од Универзитетот Вухан во студијата објавена на сајтот medRxiv.
„За разлика од крвната група А, луѓето со крвна група О имаат сигнификантно понизок ризик од зараза во споредба со сите други крвни групи“.
И додека овие резултати би можеле да им бидат од помош на медицинските професионалци, обичните луѓе не би требало да ја земаат оваа статистика премногу сериозно. „Ако сте тип А, нема потреба да паничите. Тоа не значи дека 100 % ќе бидете инфицирани. Ако сте тип О, не значи дека сте апсолутно „на сигурно“. Се уште треба да ги миете рацете и да ги следите препораките на здравствените власти, пишува „South China Morning Post“.
