ПИШУВА:
М-р Ивана Урдаревиќ
логопед, специјален едукатор и рехабилитатор
♦♦♦♦♦♦♦
Логопедијата е наука која се занимава со превенција, детекција, дијагностика и третман на патологијата на вербалната комуникација под која се подразбираат сите оние процеси и функции кои се поврзани со продукцијата на говор, како и со перцепцијата и продукцијата на оралниот и пишан јазик, како и облиците на невербалната комуникација (дефиниција на европското здружение на логопеди – CPLOL).
Логопедијата е систем на знаења, целокупност на научните сознанија за организмот на вербалната комуникација, системот на средства за вербална комуникација и човечкиот комуникатор, односно неговата патологија, која предизвикува или може да предизвика потешкотии, пречки, ограничувања, нарушување, губење или неразвиеност на способност за вербална комуникација, односно дезинтеграција на човекот како општествено и комуникативно битие. Според тоа, логопедијата е систем на знаења, целокупност на научни сознанија за патологијата на вербална комуникација како и поимот, структурата, организацијата и технологијата на корекција, ремедијација и санација на патолошката состојба, односно хабилитација и рехабилитација на лицата со патологија во вербалната комуникација.
Логопатија е заеднички термин за сите облици на потешкотии, ограничувања, оштетувања, нарушувања кои ја оневозможуваат вербалната комуникација. Појмовно и лексички ги опфаќа сите аберантни, девијантни и патолошки состојби на ниво на организмот и системот на средства за орално-вербална комукација, односно состојби на човекот – комуникатор во неговата био-психо-социјална структура како општествено комуникативно битие со предизвикани аберантни, девијантни и патолошки состојби на ниво на организмот и системот на средства за орално – вербална комуникација.
Логопат е лице со аберантни, девијантни и патолошки состојби на орално – вербалната комуникација.
Фонопат е лице со аберантни, девијантни и патолошки состојби на орално – вербалната комуникација на подрачјето на гласот и фонацијата.
Афазичар е лице со патологија на јазикот и говорот, со или без проблеми со читањето и пишувањето, како резултат на оштетување на мозокот.
Логопед е носител на професионалната дејност.
Фонопедија е логопедска дисциплина која се занимава со проучување на етиологијата, симптоматологијата, состојбите и последиците од патологијата на организмот за вербална комуникација и на нарушување на неговата функција во доменот на гласот, како и со рехабилитација на лицата со оштетување, потешкотија, ограничување, нарушување и исклучување на фонацијата во орално – вербалната комуникација и пеењето.
Фонопед е диференциран и субспецијализиран клинички логопед за фонопедија.
Афазиологија е логопедска субдисциплина, која се занимава со проучување на етиологијата, симптоматологијата, состојбите и последиците од патологијата на организмот за вербална комуникација и нарушувањата на неговата функција во доменот на јазикот и говорот како резултат на морбидитет и трауми на ниво на мозокот.
Афазиолог е диференциран или субспецијализиран клинички логопед за афазиологија.
Логометрија е логопедска субдисциплина која се занимава со проучување , усовршување, стандардизација, адаптација, валоризација, изработка и апликација на тестот и техничките мерни инструменти кои се неопходни и кои се применуваат во логопедската истражувачка и дијагностичка работа. Нејзиниот предмет ја опфаќа патологијата на сите делови на организмот и системот на средства за вербална комуникација. Со логометрија се занимаваат дипломирани логопеди и логопеди специјалисти за клиничка логопедија.
Логопротетика е логопедска субдисциплина која се занимава со проучување, усовршување, унапредување, адаптација, апликација и одржување на артикулациските, фонаторните, резонаторните и автоконтролна-логопедска протетика. Со логопротетика се занимаваат дипломирани логопеди и логопеди специјалисти за клиничка логопедија.
