Високите температури можат сериозно да влијаат врз здравјето на доенчињата и малите деца, кои се меѓу најчувствителните групи на населението за време на топлотните бранови. Поради незрелите механизми за регулирање на телесната температура, поголемата загуба на течности и зависноста од возрасните за соодветна грижа, тие се изложени на зголемен ризик од прегревање, дехидратација, топлинска исцрпеност и други здравствени состојби поврзани со високите температури.
Соодветната заштита подразбира ограничување на изложеноста на сонце, обезбедување доволен внес на течности, лесна и соодветна облека, престој во разладени простории и препознавање на раните знаци на прегревање. Мерките за заштита треба да бидат прилагодени на возраста на детето, начинот на исхрана и неговите развојни потреби, бидејќи препораките за новороденчиња, доенчиња и предучилишни деца не се исти.
Следните препораки на Институтот за јавно здравје (ИЈЗ) имаат цел да им помогнат на родителите да обезбедат безбедна средина за децата во текот на топлите денови и да го намалат ризикот од здравствени последици предизвикани од високите температури.
ДОЕНЧИЊА ДО 6 МЕСЕЦИ
- Не изложувајте го доенчето на директна сончева светлина. Престојувајте во сенка и избегнувајте излегување во најтоплиот период од денот, особено од 11 до 17 часот.
- Облечете го во лесна, широка и светла облека од природни материјали која овозможува кожата да дише, а изложените делови од телото заштитете ги од директно сончево зрачење.
- Заштитете ги главата, лицето, ушите и вратот со соодветна капа со широк обод и користете сенка или заштитна покривка на количката. Не покривајте ја целосно количката со ткаенина или прекривка што може да ја намали циркулацијата на воздухот и да доведе до дополнително загревање.
- Кај доенчињата помлади од 6 месеци не се препорачува употреба на крем за сончање. Заштитете ги од директно сончево зрачење со престој во сенка, соодветна облека и капа со широк обод.
Во текот на топлите денови важно е детето редовно да внесува доволно вода. Родителите треба да го поттикнуваат детето да пие вода почесто и да не чекаат да почувствува силна жед, особено за време на игра и физичка активност
- Во текот на топлите денови, доенчињата до шестмесечна возраст кои се хранат исклучиво со мајчино млеко треба почесто да се дојат. Мајчиното млеко ги задоволува нивните потреби за течности, па затоа не е потребно дополнително да им се дава вода. Кај доенчињата кои се хранат со млечна формула или комбинирано – со мајчино млеко и млечна формула – треба особено да се внимава на соодветниот внес на течности. Млечната формула секогаш треба да се подготвува точно според упатството и не треба дополнително да се разредува со вода. Доколку постои сомневање дека на доенчето му се потребни дополнителни течности, треба да се консултира педијатар, особено ако се забележат знаци на недоволен внес на течности, дехидратација или нарушување на здравствената состојба.
- Одржувајте пријатна температура во просторијата во која престојува доенчето и редовно проверувајте дали покажува знаци на прегревање.
- Никогаш не оставајте доенче или дете само во паркирано возило, дури ни на кратко и дури ни ако возилото е во сенка.
ДОЕНЧИЊА ОД 6 ДО 12 МЕСЕЦИ
Сите наведени мерки за заштита од топлина и директно сонце важат и за оваа возраст.
- Покрај сенка, соодветна облека и капа, на деловите од кожата што не можат да бидат покриени користете крем за сончање со широк спектар на заштита (UVA/UVB) и заштитен фактор SPF 30 или повисок, наменет за детска кожа.
- Кремот за сончање нанесете го пред излегување на отворено и повторно нанесувајте го во согласност со упатството на производот, особено по капење или обилно потење.
- Во текот на топлите денови обезбедете редовен и доволен внес на течности, соодветно на возраста и начинот на исхрана на детето. Почесто нудете вода, а доколку детето се дои, продолжете и со доењето.
- Планирајте ги прошетките и престојот на отворено во посвежите делови од денот – рано наутро или подоцна попладне.
ПРЕДУЧИЛИШНИ ДЕЦА
Кај предучилишните деца престојот на директно сонце треба да се ограничи, особено во периодот од 11 до 17 часот, а на местата каде што престојуваат и играат секогаш треба да има доволно сенка. Детето треба да биде облечено во лесна, широка и светла облека од материјали што овозможуваат кожата да дише, а главата да биде заштитена со капа со широк обод. На изложените делови од кожата треба да се нанесува крем за сончање со широк спектар на заштита (UVA/UVB) и заштитен фактор SPF 30 или повисок. Кремот треба повторно да се нанесува според упатството на производителот, особено по пливање или обилно потење.
Кај доенчињата помлади од 6 месеци не се препорачува употреба на крем за сончање. Заштитете ги од директно сончево зрачење со престој во сенка, соодветна облека и капа со широк обод
Во текот на топлите денови важно е детето редовно да внесува доволно вода. Родителите треба да го поттикнуваат детето да пие вода почесто и да не чекаат да почувствува силна жед, особено за време на игра и физичка активност. Интензивните физички активности треба да се ограничат во најтоплиот дел од денот, а на детето да му се овозможат почести паузи за одмор во сенка или во разладена просторија. Исто така, корисно е да се научи да ги препознава знаците дека му е премногу топло и навреме да побара вода, одмор или престој во сенка.
Детето не треба да се остава без надзор во затворени простории што можат брзо да се загреат, а никогаш не смее да остане само во паркирано возило, дури ни на кратко и дури ни ако возилото е паркирано во сенка!
Знаци на прегревање и дехидратација
Обрнете внимание ако детето е невообичаено раздразливо или поспано, има изразена жед, сува уста, намалено мокрење, слабост, главоболка, вртоглавица, гадење или повраќање, забрзано дишење или покачена телесна температура.
Доколку детето има многу висока телесна температура, е збунето, има нарушена свест, изразена поспаност, грчеви или неговата состојба брзо се влошува, веднаш побарајте итна медицинска помош.
