Честото заболување од настинки и појавата на треска може да го зголемат ризикот кај децата да развијат егзема, покажува ново истражување.
Егземата, позната и како атописки дерматитис, е кожно заболување проследено со чешање, за кое се смета дека е предизвикано од комбинација на генетски фактори, нарушена функција на имунолошкиот систем и ослабена кожна бариера. Поради тоа, кожата полесно ја губи влагата, а иритантите полесно навлегуваат во неа.
Истражувачите откриле дека респираторните инфекции биле поврзани со поголем ризик од развој на егзема. Колку повеќе инфекции имале децата, толку била поголема веројатноста кај нив да биде дијагностицирана егзема
Егземата влијае на околу едно од пет деца и на еден од десет возрасни во Велика Британија. Најчесто се појавува во раното детство, иако кај многу деца симптомите се намалуваат со возраста. Егземата предизвикува чешање, црвенило, сувост и пукање на кожата и може значително да влијае врз квалитетот на животот.
Сега истражувачите сметаат дека можеби откриле зошто некои деца се посклони кон развој на егзема. Во студијата објавена во списанието JAMA Dermatology, истражувачите анализирале податоци од две групи деца следени од раѓање – едната од Данска, а другата од САД.
Во данската група биле следени 663 деца, кај кои секојдневно биле евидентирани инфекциите до наполнети три години. Биле бележени настинки, инфекции на ушите, тонзилитис, пневмонија, гастроентеритис и треска.
Резултатите укажуваат на долгорочна поврзаност помеѓу респираторните инфекции во раното детство и егземата
Истражувачите откриле дека респираторните инфекции биле поврзани со поголем ризик од развој на егзема. Колку повеќе инфекции имале децата, толку била поголема веројатноста кај нив да биде дијагностицирана егзема. Децата кои имале најголем број инфекции имале 60 отсто поголема веројатност да развијат егзема во споредба со оние кои имале најмалку инфекции.
Авторите сметаат дека респираторните инфекции во раното детство може да влијаат врз развојот на имунолошкиот систем на начин што ја зголемува веројатноста за појава на егзема. Наодите биле потврдени и во американската група од 707 деца. Поврзаноста останала присутна и откако истражувачите ја земале предвид употребата на антибиотици и генетските варијанти на генот filaggrin (FLG), кој е еден од најсилните познати генетски фактори поврзани со ризикот од егзема.
Научниците наведуваат: „Резултатите укажуваат на долгорочна поврзаност помеѓу респираторните инфекции во раното детство и егземата, која во претходните истражувања не била целосно разјаснета поради неусогласените наоди.“
Сепак, истражувачите нагласуваат дека станува збор за опсервациска студија, па затоа не може да се утврди дали инфекциите директно придонесуваат за развој на егзема. Дополнително, кај голем број деца егземата била дијагностицирана во периодот кога биле евидентирани и инфекциите, што го отежнува утврдувањето дали инфекциите се појавиле пред развојот на егземата, пишува Дејли мејл.
