Дури и ако ви се чини дека не знаете речиси ништо за новороденчињата, по неколку недели поминати со вашето бебе ќе го запознаете подобро од кој било друг. Ќе почнете да ја препознавате разликата меѓу плачот кога е гладно и кога е поспано, а ќе знаете и на кој начин најлесно се смирува, дали сака да се ниша или да подждригнe.
Но, како да знаете дека вашето бебе е здраво и добро напредува? Покрај редовните педијатриски прегледи, постојат неколку јасни знаци кои покажуваат дека бебето правилно расте и се развива. Овие осум показатели можат да ве уверат дека вашето малечко напредува добро и дека можете да бидете помирни и повеќе да уживате во првите месеци од неговиот живот.
СЕ СМИРУВА КОГА ЌЕ ВЕ СЛУШНЕ ИЛИ ДОПРЕ
Што покажува тоа? Дека помеѓу вас и бебето се развива силна емоционална поврзаност.
Новороденчињата плачат многу. Само зборувањето не секогаш ќе го запре плачот, но вашиот глас му е добро познат уште од времето кога било во мајчината утроба. По раѓањето, слушањето на вашиот глас, чувството на топлината на вашето тело, носењето во раце и нежното повивање му создаваат чувство на сигурност и потсетуваат на мирната средина во матката. Кога вашето присуство го смирува бебето, тоа е еден од првите знаци дека се создава цврста емоционална врска и дека неговиот емоционален развој се одвива нормално.
Зошто некои бебиња особено тешко се смируваат?
Главниот исклучок од ова правило за здраво бебе се коликите. Бебињата со колики може да бидат многу тешки за смирување, но тоа не е одраз на нивното емоционално здравје, ниту на поврзаноста што ја имаат со вас. Големата раздразливост и честото плачење се сосема вообичаени во новороденечкиот период. Ако и вашето бебе е такво, знајте дека не правите ништо погрешно. Доколку вашето бебе има продолжени периоди на плачење и се сомневате на колики, консултирајте се со педијатар. Постојат корисни техники кои можат да помогнат во ублажување на неговата непријатност, но важно е најпрво да се исклучи можноста за некоја посериозна здравствена состојба.
ИМА 8 ДО 10 МОКРИ ПЕЛЕНИ ДНЕВНО И ДОБРО НАПРЕДУВА ВО ТЕЖИНА
Што покажува тоа? Дека добива доволно мајчино млеко или млечна формула.
Редовните педијатриски контроли се најдобар начин да се следи растот на бебето. Помеѓу прегледите, бројот на мокри пелени е еден од најсигурните показатели дека внесува доволно течности и храна. Не е потребно да се грижите ако количината што ја јаде се разликува од оброк до оброк. Бебињата имаат периоди на забрзан раст, кога јадат повеќе, и периоди кога внесуваат помалку храна. Најважно е постепено и континуирано да добиваат на телесна тежина.
НЕКОЛКУ ПАТИ ВО ТЕКОТ НА ДЕНОТ Е МИРНО И БУДНО
Што покажува тоа? Дека почнува активно да учи од светот околу себе.
Првите неколку недели со новороденчето често поминуваат како во магла. Деновите главно се исполнети со хранење (приближно на секои два часа) и спиење (околу 16 часа дневно, но само по неколку часа во континуитет). Во преостанатото време има гушкање, менување пелени, празнење на цревата и плачење – и речиси ништо друго.
До крајот на првиот месец, бебињата веќе можат да гледаат и предмети оддалечени до околу 45 сантиметри. Околу вториот месец, повеќето почнуваат да ги следат со поглед шарите, светлите бои и предметите што се движат или се вртат, како што се висечките играчки над креветчето или таванскиот вентилатор
Дури кога бебето ќе почне подобро да ги контролира мускулите на очите и ќе може да го насочи погледот кон одредена цел, како што е вашето лице, ќе сфатите колку брзо учи и впива сè што се случува околу него. Кога бебињата се мирни и будни, тие внимателно ја набљудуваат околината и обработуваат огромна количина нови информации. „Бебињата почнуваат да поминуваат повеќе време будни кога ќе наполнат околу еден месец“, вели д-р Џенифер Шу, педијатар. „Тогаш можат накратко да се смират и да впиваат повеќе визуелни информации.“
СЕ ВРТИ КОН НОВИ ЗВУЦИ И ВНИМАТЕЛНО СЛУША
Што покажува тоа? Дека слухот и мозокот правилно се развиваат.
Бебињата можат да слушаат уште од самото раѓање, но потребни се неколку недели за да почнат да го издвојуваат важниот звук од постојаниот шум во секојдневното опкружување. Разбирањето дека некои звуци се поинтересни и позначајни од другите (на пример, монотониот шум на клима-уредот не е толку важен како ненадејната смеа на постарото братче или сестриче) се развива постепено.
Штом забележите дека вашето бебе реагира на звук така што се врти или го насочува погледот кон изворот на звукот, тоа е добар знак дека неговиот слух се развива правилно и дека станува сè пољубопитно за светот што го опкружува.
ГО СЛЕДИ ДВИЖЕЊЕТО И ГО ПРИВЛЕКУВААТ ШАРИ И БОИ
Што покажува тоа? Дека видот постепено се изострува, а мозокот се развива.
Можеби не ви изгледа како нешто посебно ако бебето подолго време гледа во тавански вентилатор, но и тоа е знак дека неговиот развој напредува.
Бебињата се раѓаат со вид кој сè уште не е целосно развиен. Нивната острина на видот е приближно 20/100, а најдобро гледаат предмети што се оддалечени околу 20 до 30 сантиметри – приближно колку што е растојанието помеѓу вашето лице и лицето на бебето додека го храните.
Способноста на бебето да ја издржува сопствената телесна тежина и да ја држи главата исправенa е еден од раните показатели за развојот на мускулите. Овој развој може дополнително да се поттикне со време поминато на стомаче под надзор и со слободно движење надвор од носилки и автомобилски седишта
До крајот на првиот месец, бебињата веќе можат да гледаат и предмети оддалечени до околу 45 сантиметри. Околу вториот месец, повеќето почнуваат да ги следат со поглед шарите, светлите бои и предметите што се движат или се вртат, како што се висечките играчки над креветчето или таванскиот вентилатор.
Во овој период нивниот вид за бои и перцепцијата на длабочина сè уште не се целосно развиени, па затоа најлесно им го привлекуваат вниманието силните контрасти меѓу боите. Ако забележите дека вашето бебе со интерес ја набљудува околината, тоа е одличен знак дека неговиот вид и развојот напредуваат како што треба.
ВОСПОСТАВУВА КОНТАКТ СО ОЧИТЕ, СЕ СМЕЕ И ГУГА
Што покажува тоа? Тоа е знак дека вашето бебе постепено станува дружељубиво, весело и сè повеќе се поврзува со луѓето околу себе.
Првиот вистински контакт со очите со новороденчето најчесто се воспоставува кога тоа ќе наполни околу еден месец. Првата насмевка обично се појавува околу вториот месец, гугањето околу третиот, а првото смеење најчесто до четвртиот месец. За родителите, секој од овие моменти е посебен и долгоочекуван.
Сите овие реакции покажуваат дека бебето воспоставува врска со вас и станува сè посвесно за светот што го опкружува. На некое ниво, тоа сфаќа дека луѓето почесто му посветуваат внимание кога воспоставува социјална интеракција. До околу петмесечна возраст, повеќето бебиња веќе спонтано возвраќаат со насмевка кога некој ќе им се насмевне.
Овие однесувања се важни показатели за раниот социјален и јазичен развој. „Бебињата користат говор на телото, вклучувајќи контакт со очите и изрази на лицето, многу пред да почнат да зборуваат“, вели д-р Шу. „Тоа е основа за подоцнежната комуникација со зборови.“ Кога бебето гуга и брбори, всушност ги вежба своите гласни жици и ги прави првите чекори кон развојот на говорот.
ПЛАЧЕ ПОМАЛКУ И ВОСПОСТАВУВА ПОРЕДОВЕН РИТАМ НА СПИЕЊЕ
Што покажува тоа? Дека нервниот систем созрева.
Ако почнувате да забележувате мали, но препознатливи промени во дневниот ритам на вашето бебе, кои навестуваат воспоставување рутина, тоа е одличен знак. Најверојатно, најинтензивниот период од новороденечкиот развој веќе е зад вас.
Обрнете внимание дали бебето почнува да има неколку релативно редовни дневни дремки и дали ноќе поминуваат четири или повеќе часа помеѓу хранењата. Ова постепено воспоставување на поредовен ритам е резултат на созревањето на неговиот нервен систем.
Кај некои бебиња ова се случува многу брзо, додека кај други поредовна рутина не се воспоставува сè до околу четвртиот месец. Ако вашето бебе е постаро од четири месеци, а сè уште спие и се храни во целосно непредвидливо време, обидете се постепено да воведете флексибилна, но доследна дневна рутина.
САМОСТОЈНО ЈА ДРЖИ ГЛАВАТА И СТАНУВА СÈ ПОСИЛНО
Што покажува тоа? Дека мускулите правилно се развиваат и стануваат посилни.
Многу бебиња почнуваат накратко да ја држат главата исправена уште околу првиот месец – иако тоа трае само многу кратко време. До тримесечна возраст, најчесто веќе го прават тоа почесто и со поголема сигурност. Ако вашето бебе може да ја држи главата исправена или да се придвижува додека е во вашите раце, тоа е знак дека ги активира и ги зајакнува мускулите кои постепено се развиваат.
За да му помогнете во овој процес, важно е бебето да поминува доволно време надвор од носилки и автомобилски седишта, каде што има слобода да го движи своето тело. Особено значајно е времето поминато на стомаче под надзор, бидејќи така се развиваат мускулите, вклучувајќи ги и оние кои подоцна ќе му помогнат да се превртува и самостојно да седи.
„Забележуваме дека бебињата кои немале можност да ги вежбаат мускулите преку време поминато на стомаче, почнуваат подоцна од вообичаеното да се превртуваат, да седат и да лазат“, вели д-р Шу. Затоа, обезбедете му на вашето малечко секојдневно време за игра, движење и зајакнување на мускулите, пишува Парентс.
