Родителите често се прашуваат дали плачењето на нивното бебе е нормално или е причина за загриженост. Иако причините најчесто се безопасни, како што се грчевите или никнувањето заби, една патронажна сестра предупредува дека одредени видови плачење може да укажуваат на посериозна состојба која бара лекарска помош.
Хелен, квалификувана патронажна сестра и медицинска сестра со искуство во педијатриска интензивна нега, во објава на Инстаграм објаснува какво плачење е најзагрижувачко.
„Денес сакам да зборувам за плачењето што како здравствен работник ме загрижува. Сакам да престанеме секое бебе што многу плаче да го етикетираме како бебе со грчеви“, напишала таа. „Грчевите опишуваат образец на плачење кај инаку здраво бебе. Овој термин никогаш не треба да се користи за да се намали загриженоста на родителите. Станува збор за плачење поради кое би побарала бебето повторно да биде прегледано.“
Знаци поради кои е потребен преглед
Хелен детално опишува какво плачење може да биде знак дека станува збор за нешто повеќе од вообичаените тегоби. Според неа, слабото, невообичаено високо и продорно или непрекинато плачење се причина за претпазливост.
„Загрижува плачењето при кое никако не можете да го смирите бебето или да му го одвлечете вниманието. Загрижува и ненадејното, интензивно врескање кое се јавува во напади, особено ако бебето притоа ги повлекува колената кон стомакот или пребледува меѓу епизодите на врескање“, навела таа.
„Вие најдобро го познавате вообичаениот плач на вашето бебе. Ако тој се промени и чувствувате дека нешто не е во ред, однесете го бебето на преглед. Слабото, високо или непрекинато плачење бара итна медицинска помош“, порачува патронажната сестра Хелен
Таа додава дека треба да се обрне внимание и на постојаното плачење за време или по хранењето, честото извивање на грбот, како и плачењето при секое допирање, подигнување или движење, како бебето да чувствува болка. Причина за преглед е и целосно нов образец на упорно плачење кај бебе кое претходно било мирно. Хелен нагласува дека овие знаци сами по себе не поставуваат дијагноза, но укажуваат дека бебето треба да биде прегледано од здравствен работник.
„Вие најдобро го познавате вообичаениот плач на вашето бебе. Ако тој се промени и чувствувате дека нешто не е во ред, однесете го бебето на преглед. Слабото, високо или непрекинато плачење бара итна медицинска помош“, порачала таа.
