Никнувањето на првите заби е голема пресвртница во развојот на секое бебе, но кај некои деца може да донесе и неколку непријатни денови за целото семејство. Зголеменото лигавење, потребата да грицкаат сè што ќе им дојде при рака, чувствителните непца и раздразливоста се дел од знаците што може да го придружуваат никнувањето на првите млечни заби.
Кај повеќето бебиња првите запчиња почнуваат да никнуваат околу шестиот месец, но нема причина за загриженост доколку се појават порано или подоцна. Најчесто први никнуваат долните предни запчиња.
Покрај зголеменото лигавење и постојаната потреба за џвакање, непцето на местото каде што никнува забот може да стане црвено и чувствително. Бебето може да биде понемирно од вообичаено, полошо да спие, да си го трие увото или да има зацрвенет образ.
Разладена глодалка може да помогне
Едно од наједноставните решенија е глодалка за заби. Притисокот при џвакањето може да ја ублажи непријатноста во непцата, а некои глодалки може да се изладат во фрижидер пред употреба. Студеното дополнително може да ги смири чувствителните непца.
Сепак, важно е глодалката да не се става во замрзнувач. Замрзнатиот предмет може да стане премногу тврд и да ги повреди устата и непцата на бебето.
Исто така, глодалките не треба да се врзуваат околу вратот на бебето поради ризик од задушување.
Понекогаш е доволен и чист прст
Не секогаш е потребен посебен производ. Нежното масирање на болните непца со чист прст може да помогне, бидејќи лесниот притисок ја намалува непријатноста.
Ако бебето е доволно големо за цврста храна, може да помогнат и одредени ладни намирници соодветни за неговата возраст. Сепак, детето секогаш треба да биде под надзор додека јаде поради ризик од задушување.
Внимавајте и на кожата околу устата
Зголеменото лигавење може да предизвика иритација на кожата околу устата и на образите. Нежното и редовно бришење на плунката може да помогне да се спречат осип и иритација.
Понекогаш, пак, најмногу помага нешто сосема едноставно – утеха и одвлекување на вниманието. Играњето, гушкањето или некоја нова активност може да му помогнат на бебето помалку да се фокусира на непријатноста во непцата.
Внимателно со геловите и ѓерданите за заби
Не сите производи што се рекламираат за олеснување на непријатностите при никнување на забите се подеднакво безопасни.
Американската агенција за храна и лекови (ФДА) предупредува дека производи што содржат бензокаин или лидокаин не треба да се користат за ублажување на тегобите при никнување на забите кај мали деца, бидејќи можат да предизвикаат сериозни несакани ефекти.
ФДА предупредува и за ѓерданите за никнување заби, вклучително и популарните килибарни ѓердани, поради ризик од задушување и давење.
Ако бебето е исклучително вознемирено или очигледно има болки, за соодветен лек против болка и неговата доза најдобро е да се консултирате со педијатар или фармацевт. Дозирањето на лековите кај бебињата зависи од возраста, а кај некои лекови и од телесната тежина.
