Раѓањето деца може да им помогне на жените да се заштитат од рак на дојка, покажува најновата револуционерна студија. Австралиски истражувачи откриле дека кај бремените жени, околу средината на бременоста, во ткивото на дојката природно се создаваат имунолошки клетки кои ги уништуваат клетките на ракот. Овие клетки, познати како Т-клетки убијци (killer T-cells), можат да ги штитат жените од рак на дојка и до 10 години.
Зошто расте ризикот кај помладите жени?
Жените кои никогаш не износиле бременост природно не ги создаваат овие заштитни клетки, што значи дека имаат поголем ризик за развој на болеста. Експертите објаснуваат дека овие откритија би можеле да го појаснат сè уште неразјаснетиот пораст на случаите на рак на дојка кај жени помлади од 50 години. Бројот на дијагнози кај оваа возрасна група е зголемен за повеќе од една петтина од 1990-тите години па наваму.
Во моментов, во Обединетото Кралство оваа болест секоја година погодува околу 8.500 жени помлади од 50 години. Во меѓувреме, стапката на наталитет е на најниско ниво во речиси половина век, а според истражувањата, околу три милиони жени на возраст од 16 до 45 години најверојатно никогаш нема да имаат деца.
Надеж за нови превентивни третмани
Истражувачкиот тим од центарот за рак „Peter MacCallum Cancer Centre“ смета дека овие откритија отвораат можност за развој на превентивни третмани и нудат надеж за жените кои не можат или не сакаат да имаат деца.
„Нашето истражување покажува дека жените кои во ткивото на дојката имаат високо ниво на Т-клетки убијци – специјализирани имунолошки клетки кои помагаат во откривање и уништување на абнормалните клетки – имаат подобри исходи“, изјави професорката Кара Брит, коавторка на студијата. „Овие наоди се многу возбудливи и отвораат нови можности за имунолошки превентивни интервенции кои би можеле да го намалат ризикот од развој на рак на дојка кај жени со висок ризик кои никогаш не забремениле.“
Актуелната студија, објавена во списанието Nature Immunology, покажа дека хормоните на бременоста го поттикнуваат создавањето на Т-клетки во ткивото на дојката околу четвртиот месец од бременоста. Овие клетки – чиј развој зависи од клетките што произведуваат млеко во дојката – остануваат во ткивото околу една деценија, обезбедувајќи долгорочен антитуморен ефект
Ракот на дојка денес е најчестиот вид рак во Обединетото Кралство, со повеќе од 59.000 нови случаи секоја година. Сепак, стапката на преживување е висока – околу 77 проценти од жените живеат 10 или повеќе години по поставувањето на дијагнозата.
Новата студија се надоврзува на неодамнешно истражување кое покажа дека и доењето има сличен заштитен ефект, одложувајќи ја појавата на болеста и до 10 години.
„Луѓето не сакаат да зборуваат за ова, но одложеното мајчинство е еден од најголемите фактори што придонесуваат за порастот на стапката на рак на дојка“, изјави минатиот месец за Дејли Мејл д-р Андреа де Ченси, директор на Одделот за медицинска онкологија во болницата „Галиера“ во Италија.
Како функционира овој механизам?
Актуелната студија, објавена во списанието Nature Immunology, покажа дека хормоните на бременоста го поттикнуваат создавањето на Т-клетки во ткивото на дојката околу четвртиот месец од бременоста. Овие клетки – чиј развој зависи од клетките што произведуваат млеко во дојката – остануваат во ткивото околу една деценија, обезбедувајќи долгорочен антитуморен ефект.
Со примена на хормонски третмани, истражувачите успеале да го поттикнат создавањето на овие заштитни Т-клетки и без бременост, што нуди надеж за жените кои не можат или не сакаат да имаат деца.
Коментирајќи ја студијата, Сајмон Винсент, главен научен директор на Breast Cancer Now, изјави: „Од долгорочната студија Breast Cancer Now Generations знаеме дека бременоста и раѓањето деца го намалуваат ризикот од рак на дојка, но не го знаевме точниот механизам. Оваа студија нуди првични докази дека промените во имунолошкиот систем на дојката за време на бременоста го објаснуваат тоа заштитно дејство. Сега ни се потребни дополнителни истражувања за подобро да го разбереме овој процес и да утврдиме дали тој може да отвори пат кон нови начини за превенција“, пренесува Дејли мејл.
