Високите температури особено тешко ги поднесуваат најмалите, а во текот на жешките летни денови на родителите не секогаш им е лесно да проценат дали на бебето му е премногу топло. Потењето е еден од најочигледните знаци, но постојат и помалку забележливи симптоми на кои треба да се обрне внимание.
Прегревањето може да го зголеми ризикот од синдром на ненадејна доенечка смрт (СИДС), па затоа важно е навреме да се препознаат предупредувачките знаци.
Експертите од Blueberry Pediatrics издвојуваат седум знаци кои родителите треба да ги следат.
- Зголемено потење или влажна коса
Проверете дали скалпот, вратот или пределот околу линијата на косата се невообичаено испотени. Влажната коса може да биде еден од првите знаци дека на бебето му е премногу топло.
- Црвени и топли образи
Зацрвенетите и топли образи исто така може да укажуваат дека бебето се прегрева, особено ако истовремено се присутни и други знаци.
- Многу топли или испотени гради, стомак или грб
Со допир проверете ги градите, стомакот или грбот на бебето. Ако овие делови се невообичаено жешки или испотени, можно е бебето да е премногу облечено или просторијата да е претопла.
- Забрзано дишење
Ако бебето дише забележително побрзо од вообичаено, тоа може да биде знак дека му е премногу топло, особено ако се појават и други симптоми.
- Топлотен осип
Во топлите денови може да се појави топлотен осип – ситни црвени или розови точки, најчесто на вратот, градите или грбот. Тој се јавува кога потта останува заробена во кожата поради затнати потни жлезди.
- Раздразливост и немир
На бебето на кое му е премногу топло може да му биде потешко да се смири. Може да биде раздразливо, немирно и да спие понеспокојно.
- Необична поспаност, безволност или млитавост
Ова е знак на кој треба да се посвети особено внимание. Ако бебето е невообичаено поспано, тешко се буди, не реагира како вообичаено или има други загрижувачки симптоми, веднаш побарајте медицинска помош.
Како да спречите прегревање на бебето?
За да се намали ризикот од прегревање, важно е да се внимава на температурата во просторијата во која спие бебето. Како прифатлив опсег често се наведува температура од 16 до 20 степени Целзиусови.
Дали на бебето му е премногу топло најдобро може да се провери со допирање на градите или тилот. Рацете и стапалата на бебињата често се природно поладни, па затоа не се најсигурен показател.
Ако градите или тилот се жешки или испотени, отстранете еден слој облека или постелнина. Не треба да се потпирате само на допир ако се сомневате дека бебето има покачена телесна температура – во таков случај измерете ја температурата со соодветен термометар.
Ако бебето е многу жешко, невообичаено поспано, млитаво, тешко се буди или има проблеми со дишењето, не чекајте состојбата да се подобри сама од себе, туку веднаш побарајте медицинска помош.
