Три од четири родители го ставаат здравјето на своите деца пред сопственото. Поради обврските околу семејството, работата и грижата за болното дете, многумина ги одложуваат сопствените лекарски прегледи, ги занемаруваат симптомите или продолжуваат да работат и кога не се чувствуваат добро.
Истражувањето, спроведено на 2.000 родители со деца помлади од 16 години, покажало дека ваквото однесување кај голем дел од нив довело до влошување на здравствената состојба.
Ги одложуваат прегледите и лекувањето
Половина од родителите кои признале дека сопственото здравје го ставиле во втор план велат дека ги игнорирале симптомите за да можат да се посветат на децата. Една третина од нив одложиле да побараат медицинска помош.
Дополнително, 24 отсто од родителите откажале лекарски преглед затоа што биле премногу зафатени. Кај 20 отсто биле одложени превентивните прегледи, додека 19 отсто го одложиле и самото лекување.
Дури 71 отсто од испитаниците изјавиле дека нивната здравствена состојба се влошила токму поради ваквото одложување.
Боледувањето го „чуваат“ за децата
Проблемот е особено изразен кај вработените родители. Две третини, односно 66 отсто од нив, избегнуваат да земат боледување кога самите се болни бидејќи сметаат дека слободните денови треба да ги „чуваат“ за ситуациите кога ќе се разболи нивното дете.
Уште 58 отсто продолжиле да работат и покрај болеста, затоа што се загрижени дека веќе искористиле премногу слободни денови за грижа за болно дете.
„Еден од најстресните периоди за родителот е кога детето е болно“, вели д-р Навин Пури, медицински директор во Bupa UK Insurance, компанијата која го нарачала истражувањето.
Тој посочува дека е разбирливо родителите да се обидуваат да ја усогласат грижата за децата со работата, домашните обврски и останатите членови на семејството, но притоа не треба да го забораваат сопственото здравје.
Според него, родителите премногу често работат и кога се болни наместо да се опорават, ги игнорираат симптомите или го одложуваат одењето на лекар иако се загрижени за својата состојба.
Болеста на детето носи голем товар
Истражувањето покажало дека 63 отсто од родителите се чувствуваат преоптоварено кога нивното дете е болно, а 41 отсто имаат чувство дека некој во семејството постојано е болен.
Во просек, родителите поминуваат нешто повеќе од два часа неделно занимавајќи се со здравствените проблеми на своите деца. На годишно ниво, тоа се повеќе од четири цели дена.
Загриженоста е присутна и кога детето не е болно. Дури 62 отсто од родителите велат дека постојано се грижат за здравјето на своите деца, додека 81 отсто сметаат дека болеста во семејството е стресна.
Што најмногу ги загрижува родителите?
Најголем извор на стрес кога детето е болно е грижата за тоа како се чувствува детето – така одговориле 51 отсто од испитаниците.
Следуваат нарушувањето на сонот, кое го посочиле 43 отсто од родителите, и усогласувањето на грижата за болното дете со секојдневните обврски, со 40 отсто.
За 38 отсто од родителите дополнителен проблем е усогласувањето на работата со грижата за детето. Други потешкотии се проценката кога треба да се побара лекарски совет, што го навеле 28 отсто, и организирањето термини за прегледи, што го посочиле 25 отсто од испитаниците.
Повеќето родители сметаат дека подобро се грижат за децата отколку за себе
Истражувањето, спроведено од агенцијата OnePoll, покажало и дека 80 отсто од родителите сметаат дека подобро се грижат за здравјето на своите деца отколку за сопственото.
Кај една четвртина од испитаниците, целата одговорност за грижата за здравјето на семејството паѓа исклучиво на нив.
На прашањето што би им ја олеснило ситуацијата, 45 отсто од родителите одговориле дека би им помогнал брз пристап до лекарски совет, додека 40 отсто посакуваат пократко чекање за прегледи.
„Кога вашето дете или кој било друг член на семејството е болен, сакате што побрзо да ја обезбедите потребната грижа. Тоа не само што го намалува стресот поради болеста на блиската личност, туку им остава на родителите време да се посветат и на сопственото здравје“, заклучува д-р Пури.
