Шест грешки што родителите често ги прават кога децата немаат добри манири

Децата не се раѓаат со знаење кога треба да кажат „те молам“ и „благодарам“, како треба да се однесуваат на маса или зошто не е пристојно да им се упаѓа на другите во збор. Манирите се учат со пример, разговор, насочување и многу повторување. Експертите издвојуваат шест чести родителски грешки кои можат да го отежнат овој процес.

Доброто однесување не доаѓа автоматски. Децата најмногу учат набљудувајќи ги возрасните околу себе, особено родителите, но важни се и јасните правила, објаснувањата и доследноста.

Не им даваат добар пример

Децата во голема мера го усвојуваат однесувањето што го гледаат кај луѓето околу себе. Американската академија за педијатрија (AAP) нагласува дека родителите со сопствениот пример и со начинот на кој се справуваат со проблемите им покажуваат на децата како да се однесуваат.

Затоа, тешко е да се очекува детето да не им упаѓа на другите во збор или да не го користи телефонот за време на оброкот, ако редовно ги гледа родителите како го прават истото.

Не објаснуваат зошто е важно убавото однесување

На децата не им е доволно само да им се каже што смеат, а што не смеат да прават. Многу полесно ги разбираат правилата кога ќе им се објасни и нивната причина.

Гејл Витворт, која работи во областа на развојот на младите при Универзитетот во Флорида, советува родителите да разговараат со децата за манирите што се особено важни за нивното семејство.

На тој начин детето полесно разбира дека пристојното однесување не е само список на правила што мора да ги почитува затоа што „така рекле мама и тато“, туку начин на кој покажуваме почит кон другите.

Луѓето околу детето не ги почитуваат истите правила

На родителите им е потешко да воспостават одредени навики кога другите блиски луѓе испраќаат спротивни пораки.

На пример, ако членовите на поширокото семејство се смеат кога детето се однесува непристојно или дури го поттикнуваат таквото однесување, детето добива нејасна порака за тоа што е прифатливо.

Затоа е важно луѓето кои редовно поминуваат време со детето да ги почитуваат правилата што родителите се обидуваат да ги воспостават.

Не се доследни кога го коригираат однесувањето

Повторувањето е важен дел од учењето кај децата. Психологот Ванеса Лобју посочува дека децата полесно усвојуваат нови зборови и однесувања кога информациите и активностите се повторуваат.

Ако родителите еден ден реагираат на непристојното однесување, а следниот ден целосно го игнорираат, на детето може да му биде потешко да разбере што точно се очекува од него.

Не го пофалуваат напредокот

Родителите понекогаш се фокусираат главно на грешките и забораваат да ги забележат моментите кога детето се однесува убаво.

Од Американската академија за педијатрија советуваат родителите да му посветат внимание на детето кога покажува посакувано однесување и да го пофалат кога навистина се потрудило.

Таквата реакција му дава на детето јасна повратна информација дека неговото добро однесување е забележано и ценето.

Мислат дека проблемот секогаш е кај туѓите деца

На родителите понекогаш им е полесно да го забележат непристојното однесување кај другите деца отколку истото однесување кај сопственото дете.

Истражување спроведено во 2023 година меѓу повеќе од 1.000 родители покажало интересна разлика во перцепцијата. Околу 38 отсто од родителите рекле дека нивните деца ги лажат, а 42 отсто дека нивните деца се однесуваат без почит кон другите.

Во исто време, дури 85 отсто од родителите сметале дека денешните деца генерално не се искрени, додека 83 отсто сметале дека им е важно само себеси.

Најважно е родителите да имаат предвид дека манирите не се нешто со кое детето едноставно се раѓа. Тие се градат постепено – преку пример, јасни правила, трпение, доследност и охрабрување.