Иако повеќето жени знаат дека доаѓањето на бебето го менува животот, малкумина се свесни колку многу се менува и самото тело – барем додека не поминат неколку недели по породувањето.
„Едно од најголемите изненадувања за новите мајки за време на опоравувањето е бројот на симптоми за кои никој претходно не ги предупредил“, вели Викторија Куомо, медицинска сестра и предавач на Технолошкиот институт во Њујорк. „Повеќето очекуваат одредено ниво на болка и исцрпеност, но често не се подготвени за хормоналните и физичките промени кои можат да траат со недели, па дури и со месеци.“
Според експертите, бројните физички промени што се појавуваат по породувањето се дел од природниот процес на опоравување. Нивното траење се разликува од жена до жена, а лекарите можат да помогнат во проценката на симптомите и да дадат совети за ублажување на тегобите во текот на опоравувањето.
Тресење и морници
Ленис Вилис од Вудсток, Илиноис, се сеќава дека се тресела непосредно пред раѓањето на својата ќерка, а потоа и во собата за опоравување.
„Забите толку многу ми тропаа што ми трепереше и гласот“, вели Ленис.
Никол Куро од Белмор, Њујорк, се сеќава дека се тресела со денови по породувањето и не ѝ било јасно зошто.
„Беше непријатно и на почетокот ме исплаши, но мајка ми ми кажа дека и таа се тресела и дека тоа е сосема нормално“, раскажува Никол.
„Причината за тресењето по породувањето обично е реакција на наглите хормонални промени, како што се промената на нивото на естрогенот, ослободувањето на окситоцин и адреналин, како и промените во количината на телесни течности“, објаснува д-р Викторија Петруци, гинеколог во болницата Хјустон Методист.
Симптомите би требало да се смират во рок од неколку часа, а во некои случаи може да помогне и контактот „кожа на кожа“ со новороденчето.
Ноќно потење
Рејчел Џерард од Смиттаун, Њујорк, чувствувала топлотни бранови од глава до пети по раѓањето на својата ќерка.
„Се сеќавам како седев на болничкиот кревет и ги гледав капките пот на прстите на нозете“, вели таа.
Ноќното потење почесто се поврзува со менопаузата, но причината е иста.
„Го предизвикуваат хормоналните промени, поточно намалувањето на естрогенот и прогестеронот“, вели д-р Кимберли Колман, гинеколог во медицинската групација Педијатрикс Медикал Груп на Флорида.
Таа додава дека ноќното потење може да биде и начин на кој телото се ослободува од вишокот течности наталожени за време на бременоста.
Оваа појава може да трае до два месеца, а и подолго доколку жената дои. Д-р Колман препорачува внесување доволно вода во текот на денот, а навечер врз чаршафот може да се стави поголем пешкир кој ќе ја впива влагата.
Грчеви слични на породилни болки
Откако ќе заврши породувањето, повеќето жени очекуваат и болките да престанат. Сепак, тоа не се случува веднаш.
„Повеќето жени се изненадени што грчевите продолжуваат и по породувањето, особено за време на доењето“, вели Куомо. „Овие последователни контракции се случуваат бидејќи окситоцинот ја поттикнува матката да се контрахира за да се врати во нормалната големина.“
Непријатноста во повеќето случаи значително се намалува во рок од една недела. Во меѓувреме можат да помогнат топли облоги, внесување доволно течности, редовно празнење на мочниот меур и лекови против болка според препорака на лекар.
Зголемено опаѓање на косата
Рејчел Џерард почнала да забележува засилено опаѓање на косата околу пет месеци по породувањето, што е уште една последица од хормоналните промени.
„Оваа состојба може да биде поизразена доколку постојат проблеми со тироидната жлезда или ако дошло до крвавење по породувањето“, забележува д-р Петруци.
Опаѓањето на косата може да трае од неколку недели до неколку месеци. Поради тоа, лекарите препорачуваат продолжување со земањето пренатални витамини и консултација со гинеколог доколку состојбата се влошува.
Рејчел почнала да користи и серум против опаѓање на косата, кој ѝ помогнал при растот на новата коса.
Чувство на „фантомски удари“ во стомакот
Чувството на движења во стомакот, познато како „фантомски удари“, може да биде многу реално иако бебето повеќе не е во матката.
Станува збор за резултат на поврзаноста меѓу умот и телото.
„Мозокот и телото се навикнати на тоа чувство, па телото може нормалните процеси на варење и движењето на цревата да ги протолкува како движења на бебето“, објаснува д-р Петруци.
Друга можна причина се гасовите кои се движат низ цревата, што создава речиси идентично чувство, вели д-р Колман.
Овие „удари“ можат да се појавуваат неколку месеци и не се причина за загриженост. Сепак, доколку станат вознемирувачки, се советува разговор со терапевт.
Отекување на нозете и стапалата
Ленис Вилис била изненадена од тоа колку ѝ отекле нозете по породувањето. Биле толку отечени што едвај можела да ги свитка колената.
Рејчел Џерард, пак, првата недела по породувањето одела боса бидејќи не можела да ги обуе чевлите.
„Стапалото ми се зголеми за половина број, а морав да го проширам и венчалниот прстен“, додава Рејчел.
Наталожувањето течности од бременоста, заедно со инфузијата примена за време на породувањето, може да придонесе за силно отекување.
„Ова обично се влошува во првите една до две недели, а потоа постепено се повлекува кога телото ќе се ослободи од вишокот течности преку мокрење или потење“, вели д-р Колман.
Таа препорачува внесување повеќе вода и одмор со подигнати нозе.
Постпородилна анксиозност
„Многу се зборува за постпородилната депресија, но ретко за она што може да се случи на другиот крај од спектарот“, вели Ленис Вилис, која се соочила со постпородилна анксиозност.
Иако во болницата се чувствувала добро, симптомите ѝ се влошиле по враќањето дома.
„Бев многу немирна, чувствував мачнина, немав апетит и страдав од тешка несоница“, раскажува Ленис.
Според медицинската сестра Куомо, постпородилната анксиозност често останува непрепознаена, но не треба да се игнорира.
„Многу жени по породувањето имаат наметливи мисли, живописни соништа, ноќни панични напади или зголемена анксиозност“, вели таа, истакнувајќи дека хормоналните промени и недостигот од сон се важни фактори.
Куомо советува одмор, барање поддршка од блиските и разговор со лекар.
Ленис на крајот му се доверила на својот гинеколог, кој ја упатил кај психолог. Еден месец подоцна, таа се чувствувала значително подобро.
Неконтролирано испуштање урина
Менувањето на долната облека по смеење можеби изгледа како неизбежен дел од животот по породувањето, но инконтиненцијата не мора да се трпи.
„Бременоста и вагиналното породување создаваат голем притисок врз мускулите на карличното дно и околните нерви“, објаснува Куомо.
Благите симптоми обично се повлекуваат во рок од неколку недели или месеци. Кај потешките случаи можат да помогнат Кегеловите вежби и физиотерапија на карличното дно.
Засилен мирис на телото
Мирисот на телото по породувањето може да стане прилично интензивен, а причината се хормоните, зголемениот вагинален исцедок и создавањето млеко.
„Никој не ми кажа дека поради доењето постојано ќе имам непријатен мирис“, вели Никол Куро, која промената ја забележала уште за време на бременоста.
Според д-р Колман, непријатниот мирис обично исчезнува шест до осум недели по породувањето.
Во меѓувреме, таа препорачува внесување повеќе вода, урамнотежена исхрана со помалку преработена храна и кофеин, како и почесто туширање.
