Постојат повеќе причини поради кои бебето може да одбие да цица – односно, по неколку месеци успешно доење, одеднаш да престане да сака да цица. Најчесто, на овој начин бебето се обидува да покаже дека нешто не му одговара.
Сепак, одбивањето на доењето не значи дека бебето е подготвено да престане со доењето. Ваквиот „штрајк“ најчесто е краткотраен.
Најчести причини
Болка или непријатност. Никнувањето на забите, габична инфекција во устата или херпес на усните може да предизвикаат болка при доењето. Инфекцијата на увото може да предизвика болка при цицање или при лежење на едната страна. И повреда или болка по вакцинацијата може да предизвика непријатност во одредена положба при доење.
Болест. Настинка или затнат нос може да му го отежнат дишењето на бебето додека цица.
Стрес или расеаност. Преголемата изложеност на дразби, одложувањето на подојот или подолгото одвојување од мајката може да го направат бебето вознемирено и да му го отежнат доењето. Истото може да се случи и ако мајката реагирала многу бурно кога бебето ја гризнало за време на доењето. Понекогаш бебето едноставно е премногу расеано за да цица.
Необични мириси или промени во вкусот. Промената на мирисот на мајката поради нов сапун, парфем, лосион или дезодоранс може да предизвика бебето да изгуби интерес за доењето. Промената на вкусот на мајчиното млеко – поради храната што ја јаде мајката, лекови, менструација или нова бременост – исто така може да доведе до одбивање на доењето.
Намалено количество млеко. Дохранувањето со формула или премногу честото користење цуцла може да придонесе за намалување на количеството на мајчиното млеко.
Што да направите ако бебето одбива да цица?
Одбивањето на доењето може да биде непријатно и за мајката и за бебето. Можно е да се чувствувате одбиено и фрустрирано. Сепак, немојте да се обвинувате себеси – ова не е ваша вина.
Никнувањето на забите, габична инфекција во устата или херпес на усните може да предизвикаат болка при доењето. Инфекцијата на увото може да предизвика болка при цицање или при лежење на едната страна. И повреда или болка по вакцинацијата може да предизвика непријатност во одредена положба при доење
За да спречите преполнување на градите и да го одржите производството на млеко, измолзувајте се онолку често колку што бебето вообичаено би цицало. Измолзеното млеко можете да му го дадете на бебето со лажичка, капалка или шише. Може да помогне и следново:
Продолжете да му нудите да цица. Ако бебето е вознемирено, престанете и обидете се повторно подоцна. Може да пробате да го доите кога е многу поспано.
Променете ја положбата. Обидете се со различни положби за доење. Ако бебето има затнат нос, може да помогне носот да се исчисти пред подојот.
Намалете ги дразбите. Обидете се да го доите бебето во тивка просторија, без дистракции.
Гушкајте го бебето. Контактот кожа на кожа може повторно да го поттикне интересот на бебето за доење. Може да пробате да го ставите на града додека заедно се капете во топла бања.
Ако бебето гризе, останете смирени. Ако бебето ве гризне за време на доењето, останете смирени и ставете го прстот во неговата уста за брзо да го прекинете вакуумот.
Размислете за промените во вашата рутина. Размислете дали неодамна се случило нешто што може да го вознемири бебето. Дали сте под стрес? Дали земате нови лекови? Дали сте ја промениле исхраната? Дали користите нов парфем или миризлив сапун? Дали постои можност повторно да сте бремени? Грижете се и за себе.
Ако одбивањето на доењето трае повеќе од неколку дена, ако бебето има помалку мокри пелени од вообичаено или ако сте загрижени поради тешкотиите со доењето, консултирајте се со педијатар.
