Ако вашиот тинејџер тешко се буди за време на викендите и сака да спие подолго, можеби не треба веднаш да го будите. Ново истражување покажало дека младите кои за време на викендот го надополнуваат сонот што го изгубиле во текот на неделата имаат 41 отсто помали шанси да имаат секојдневни симптоми на депресија.
Станува збор за истражување објавено во списанието Journal of Affective Disorders, во кое биле опфатени млади на возраст од 16 до 24 години, пишува Parents.com.
Авторите истакнуваат дека резултатите дополнително ја потврдуваат поврзаноста меѓу сонот и менталното здравје. Проблемот е што многу тинејџери во текот на работната недела не спијат доволно. Затоа, подолгото спиење за време на викендот не мора да значи дека се мрзливи, туку може да биде начин на кој организмот се обидува да го надомести недостигот од сон.
На тинејџерите им треба повеќе сон отколку што добиваат
„Често ги убедувам родителите дека подолгото спиење за време на викендот не е знак на мрзеливост, туку биолошки одговор на вистинскиот недостиг од сон“, вели д-р Венди Троксел, клинички психолог и специјалист за медицина на спиењето.
На повеќето тинејџери им се потребни околу девет часа сон, додека средношколците во просек спијат само шест до седум часа. До крајот на училишната недела, така можат да насоберат и повеќе од десет часа недостиг од сон.
Сонот е особено важен во адолесценцијата, период кога мозокот сè уште интензивно се развива. Недостигот од сон е поврзан со полошо расположение, потешкотии со концентрацијата, како и со симптоми на анксиозност и депресија.
„Кога не сте наспани, денот ви изгледа потежок и понегативен и предизвикува повеќе анксиозност“, објаснува психотерапевтката Хедер Турџон.
Колку подолго може да спијат за викенд?
Психолозите и лекарите сметаат дека надополнувањето на сонот за време на викендот е во ред, но не треба да се претерува.
Д-р Џејсон Карбоун, еден од авторите на истражувањето, наведува дека некои истражувања спроведени кај возрасни покажале корист од до два часа дополнителен сон.
Турџон исто така препорачува тинејџерите за време на викендот да не спијат повеќе од околу два часа подолго од вообичаеното. На тој начин можат да надоместат дел од пропуштениот сон, без премногу да го нарушат ритамот на спиење и да си го отежнат враќањето на училишните обврски.
Важни се и добрите навики – редовно време за легнување, што помалку изложеност на екрани пред спиење и избегнување кофеин во попладневните и вечерните часови.
Кога долгото спиење може да биде знак за проблем?
Повременото подолго спиење за време на викендите главно не е причина за загриженост. Но, ако тинејџерот редовно спие пет или повеќе часа подолго отколку во текот на неделата, постојано е уморен, тешко се буди за училиште или има проблеми со концентрацијата и пад на успехот, вреди да се обрне внимание.
Причина за загриженост може да биде и ако долгото спиење се појави заедно со повлекување од друштвото, губење интерес за активности што претходно ги сакал или значителни промени во расположението.
„Сакаме малку да се наспијат, а потоа да излезат и да го прават она што го сакаат“, заклучува Турџон.
