Кога бебето или детето има треска, тоа најчесто е знак дека организмот се бори со болест или инфекција. Треската најчесто не е опасна. Напротив, може да биде добар знак дека имунолошкиот систем на детето функционира и дека организмот се обидува да се избори со инфекцијата.
Кога детето има треска, најважно е:
- да внесува доволно течности за да не дехидрира;
- да се следат знаците и симптомите кои можат да укажуваат на сериозна болест.
Добар знак е ако детето по давањето лек за намалување на непријатноста повторно си игра и комуницира со вас.
Веднаш јавете се кај педијатар ако детето има треска и:
- изгледа многу болно, е невообичаено поспано или многу раздразливо;
- било изложено на голема топлина, на пример, било оставено во прегреан автомобил;
- има и други симптоми, како вкочанет врат, силна главоболка, силна болка во грлото, силна болка во увото, отежнато дишење, необјаснив осип или повторено повраќање и дијареја;
- има нарушен имунолошки систем, на пример, поради српеста анемија или карцином, или зема кортикостероиди или други лекови кои можат да влијаат врз имунитетот;
- има срцево заболување поради кое потешко ја поднесува треската и забрзаниот пулс што може да ја придружува;
- имало напад;
- е помладо од 3 месеци (12 недели) и има температура од 38 °C или повисока;
- температурата повторно се искачува над 40 °C, без оглед на возраста.
Јавете се кај педијатар и ако:
- детето и понатаму изгледа болно и се однесува како да е болно откако температурата ќе се намали;
- состојбата на детето се влошува;
- треската трае повеќе од 24 часа кај дете помладо од 2 години;
- треската трае повеќе од 3 дена (72 часа) кај дете на возраст од 2 години или постаро.
Запомнете:
Ако имате какви било прашања или сте загрижени за здравјето на вашето дете, задолжително обратете се кај педијатар, советуваат од Американската академија за педијатрија.
