Септември ни е пред врата, а многу родители веќе започнаа со набавка на училишни чанти. Многумина се во недоумица каква чанта да изберат, а притоа да не го загрозат здравјето и физичкиот развој на детето, што може да се случи ако училишната чанта е премногу тешка.
Тешката училишна чанта ги оптоварува рамениците, грбот и вратот на учениците. Покрај тоа, тежината на чантата го повлекува детето наназад, па горниот дел од телото се наведнува нанапред за да се одржи рамнотежата. Кога ова се повторува од ден на ден, последиците може да бидат неправилно држење на телото и искривена положба на ‘рбетот, болки и вкочанетост, проблеми со флексибилноста и намален обем на движење.
Негативното влијание на училишната чанта врз здравјето на децата најчесто се манифестира со болки во долниот дел од грбот и во целиот мускулно-скелетен систем, предупредуваат од Хрватскиот завод за јавно здравство. Како негативни последици се јавуваат неправилно држење на телото, замор, исцрпеност и намалена концентрација, односно послаб успех на училиште.
Ученик кој тежи 25 килограми не треба да носи чанта потешка од 2,5 килограми
Поново истражување на американските и новозеландските автори (Кистнер и соработниците; Маки Х.В. и Лег) покажало дека тежината на полната училишна чанта треба да биде ограничена на 10 проценти од телесната тежина на детето, бидејќи веќе тежина од 15 или 20 проценти ги зголемува изгледите за наведнување на главата нанапред, замор, исцрпеност и болки во грбот, како и тешкотии при одење и одржување рамнотежа.
Тоа значи дека ученик кој тежи 25 килограми не треба да носи чанта потешка од 2,5 килограми.
Што е неправилно држење на телото?
Неправилното држење на телото подразбира неправилен однос меѓу мускулно-скелетните структури без анатомски промени на ‘рбетот. Оптоварувањата што дејствуваат врз телото не се пренесуваат рамномерно долж ‘рбетот, што доведува до зголемено оптоварување на коските, мускулите и зглобовите. Тоа е честа појава и се јавува кај 20 до 25 проценти од децата на училишна возраст.
Покрај тешката училишна чанта, за неправилното држење на телото кај учениците придонесуваат и долгото седење, недостигот од физичка активност и наглиот раст во адолесценцијата.
Оптималната училишна чанта е лесна, се носи на двете рамена и што е можно повисоко во однос на ‘рбетот
Неправилното држење на телото може да предизвика болки во вратот, грбот, рамената и нозете, а се поврзува и со главоболка, замор и стрес. На долг рок, може да доведе до сериозни мускулно-скелетни нарушувања.
Како треба да се држи детето?
Правилното држење на телото во исправена положба подразбира, гледано од страна, ушите, рамената, колковите, колената и зглобовите на стапалата да бидат во една линија. Во седечка положба, главата треба да биде подигната, а грбот исправен, при што се задржува природната положба на ‘рбетот. Во лежечка положба, главата и вратот треба да бидат во линија со грбот. Сè што отстапува од ова може да упатува на неправилно држење на телото и бара лекарски преглед за да се постави дијагноза.
Внимателно при изборот на училишната чанта
Неправилното држење на телото најдобро може да се коригира со зајакнување на мускулите. На децата им се препорачува да бидат физички активни најмалку 60 минути дневно. Пливањето, трчањето и возењето велосипед се само дел од препорачаните активности. Постарите деца и адолесцентите можат да научат вежби од медицинската гимнастика, а по неколку дена вежбање со терапевт, подоцна можат самостојно да ги практикуваат и дома.
Треба да се избегнува долго седење, особено пред компјутер или со мобилни уреди. Читањето ситни букви од екранот на мобилниот телефон, освен што може негативно да влијае врз видот, неповолно дејствува и на вратниот дел од ‘рбетот. А нешто врз што можеме едноставно да влијаеме е внимателниот избор на училишната чанта.
Различни чанти – различни проблеми
Чантите што се носат напред, како и оние што се носат и напред и назад, односно на грб, имаат помало негативно влијание врз држењето на телото кај децата отколку чантите што се носат само на грб. Чантите што се носат на едно рамо се поврзани со поголема зачестеност на респираторни нарушувања и поголеми промени во држењето на телото кај децата во споредба со чантите што се носат на двете рамена. Посилното или послабото затегнување на ремените на чантата нема значително влијание врз држењето на телото, чувството на непријатност и рамнотежата кај децата.
Покрај тешката училишна чанта, за неправилното држење на телото кај учениците придонесуваат и долгото седење, недостигот од физичка активност и наглиот раст во адолесценцијата
Болката во долниот дел од грбот, како и во другите делови на мускулно-скелетниот систем, освен со училишните чанти, е поврзана и со долгото седење, особено во неправилни и неприродни положби, како и со недоволното движење и вежбање.
Училишна чанта на тркалца или класична чанта на рамо?
Училишната чанта што се носи на раменици е традиционален избор, но во последните години чантата на тркалца се наметна како алтернатива која овозможува грбот на децата конечно да се одмори од товарот на книгите и училишната опрема.
Неправилното држење на телото најдобро може да се коригира со зајакнување на мускулите. На децата им се препорачува да бидат физички активни најмалку 60 минути дневно. Пливањето, трчањето и возењето велосипед се само дел од препорачаните активности
Дали училишната чанта на тркалца ќе стане „новото нормално“ кога станува збор за училишната опрема или чантите што се носат на раменици со причина ќе останат класика, допрва треба да се види.
Физијатрите предупредуваат дека чантите на тркалца не се секогаш најсреќно решение, бидејќи повеќето деца чантата со тркалца секогаш ја влечат со истата рака, при што го наведнуваат телото настрана за да одржат рамнотежа. Исто така, тркалцата често се оштетуваат, па на крајот децата ја носат чантата на рамо. Поради дополнителната опрема, таа може да биде многу потешка од класичната училишна чанта, па детето се соочува со уште поголем товар.
Нема докази дека анатомските чанти се поздрави
Нема јасни научни докази за предностите на анатомските, ергономските и сличните, обично поскапи чанти во споредба со обичните чанти, истакнува Хрватскиот завод за јавно здравство.
Оптималната училишна чанта е лесна, се носи на двете рамена и што е можно повисоко во однос на ‘рбетот, истакнуваат од Заводот и напоменуваат дека разликите во тежината на празните чанти може да бидат и поголеми од половина килограм.
Советот е да се изберат што е можно полесни и помали тетратки и друга училишна опрема. Во училиштето треба да се носат само неопходните книги и прибор, пренесува Хина.
- ПРОЧИТАЈТЕ И…
