ПИШУВА:
Д-р Стефана Чакар-Коцевски,
специјалист по ортодонција
♦♦♦♦♦♦♦
Поставување на фиксна ортодонтска протеза е голем чекор кон здрава насмевка и подобрена естетика. Со себе носи и одговорности како што е оптимална грижа за одржување на оралното здравје.
Нередовна или неправилна орална хигиена ќе овозможи задржување на остатоци од храна околу елементите на протезата што го зголемува ризикот од појава на бели дамки (white spots), кариес или воспаление на непцата (гингивитис).
Во текот на ортодонтскиот третман задолжителни се редовни ортодонтски контроли, како и професионално чистење на забите на 4-6 месеци
Воспоставување на правилна рутина и посветеност од почетокот на ортодонтскиот третман, ќе резултира со здрава и хармонична насмевка.
- ПРЕД ПОСТАВУВАЊЕ НА ФИКСНА ОРТОДОНТСКА ПРОТЕЗА
Комплетен стоматолошки преглед
Комплетен стоматолошки преглед кој ја проверува состојбата на забите и непцата е императив за да се обезбеди здрава средина за поставување на ортодонтската протеза. Тоа значи дека сите кариозни заби треба да се санираат, а доколку постои патолошка состојба на непцата истата да се третира пред започнување на ортодонтскиот третман.
Фиксната ортодонтска протеза не само што ја подобрува естетиката на насмевката, туку значително го унапредува и оралното здравје. Со правилно поставени заби, одржувањето на хигиената станува полесно, додека совршената насмевка носи зголемена самодоверба и задоволство
Професионално чистење на забите
Пред поставувaње на фиксната ортодонтска протеза се препорачува професионално и темелно чистење на забите со отстранување на наслагите и забниот камен.
- ПО ПОСТАВУВАЊЕ НА ФИКСНА ОРТОДОНТСКА ПРОТЕЗА
Во првите денови од поставувањето на фиксната ортодонтска протеза се препорачува мека храна како супа, смуди или јогурт. Доколку некои од деловите на протезата вршат блага иритација на внатрешноста на устата, јазикот или образите, белиот восок е прва помош и делува како бариера помеѓу оралната музока и протезата.
Храна
За време на третманот со фиксна ортодонтска протеза треба да се избегнува храна која е леплива како што се карамели, мастики или гумени бонбони. Слатки и газирани пијалаци го зголемуваат ризикот од кариес и бели дамки на површината на забот околу брекетите. Тврда и крцкава храна: пуканки, чипс, јаткасти плодови генерално се избегнуваат поради ризик да ги оштетат или одлепат деловите на протезата што би го продолжило времетраењето на третманот.
Орална хигиена
Како прв чекор во оралната хигиена, пред четкање на забите, е чистење на површините помеѓу забите со интердентална четка. Овие четки доаѓаат во различни дебелини и соодветната се утврдува на стоматолошкиот преглед, индивидуално кај секој пациент. Чистењето со интердентална четка се прави еднаш на ден.
Редовно четкање на забите, наутро и навечер се препорачува да се прави со мека четка за заби или четка за заби со жлеб на средина специјализирана за чистење на заби каде има фиксна ортодонтска протеза. На четката за заби не би требало да има дополнителни гумени или пластични делови кои можат само да ги оштетат забите и непцето. Со четката се четкаат сите површини на забите: надворешна, внатрешна и џвакалните површини. Најголемо внимание се посветува на делот помеѓу брекетот и непцето, па оттука пола од површината на четката се поставува на забот, а другата половина на непцето. При четкање на забите се употребуваат кружни движења, без притоа да се аплицира голем притисок.
Како дополнителна алатка кај пациентите со фиксна ортодонтска протеза може да се користи и соло четка или четка со еден сноп влагна. Со оваа четка се четкаат просторите околу брекетот кои се помалку достапни со обичната четка за заби, но и прецизно се поминува околу гингивата на секој заб каде формирањето на наслаги е најголемо.
Редовни ортодонтски контроли
Во текот на ортодонтскиот третман задолжителни се редовни ортодонтски контроли, како и професионално чистење на забите на 4-6 месеци.
За време на третманот со фиксна ортодонтска протеза треба да се избегнува храна која е леплива како што се карамели, мастики или гумени бонбони. Слатки и газирани пијалаци го зголемуваат ризикот од кариес и бели дамки на површината на забот околу брекетите. Тврда и крцкава храна: пуканки, чипс, јаткасти плодови генерално се избегнуваат поради ризик да ги оштетат или одлепат деловите на протезата што би го продолжило времетраењето на третманот
- ПО ВАДЕЊЕ НА ФИКСНАТА ОРТОДОНТСКА ПРОТЕЗА
По вадење на протезата, забите се чистат и полираат за да се отстранат остатоците од лепак. Притоа се потенцира важноста од одржување на орална хигиена, здрави навики и редовни стоматолошки контроли.
Ретенциски апарат
За одржување на резултатите од ортодонтскиот третман се поставува ретенциски апарат. Видот на ретенциски апарат и упатството за носење како времето и фрекфенцијата го утврдува ортодонтот.
Многу често се поставува фиксен ретенциски апарат од внатрешната страна на забите кој не само што е ефикасен, туку не предизвикува никаков проблем при јадење, зборување или четкање на забите. За оптимална хигиена на фиксниот ретенциски апарат се препорачува користење на орален воден туш (water floss) кој функционира на база на аплицирање на млаз вода под притисок.
Белеење на забите (по потреба)
Белеењето на забите е козметичка процедура која има за цел да го максимизира ефектот на правилно поставени заби. Се изведува по одредено време од вадењето на фиксниот апарат и не се аплицира кај пациенти помлади од 16 години.
Фиксната ортодонтска протеза не само што ја подобрува естетиката на насмевката, туку значително го унапредува и оралното здравје. Со правилно поставени заби, одржувањето на хигиената станува полесно, додека совршената насмевка носи зголемена самодоверба и задоволство.
