♦♦♦♦♦♦♦
Од наредниот месец матичните доктори ќе можат да закажат консултативен преглед со одреден специјалист од Универзитетската клиника за детски болести. Во текот на јуни преку Мој термин ќе започне да функционира Е-амбуланта, која вклучува телефонска консултација на доктор со доктор.
Деталите за тоа како ќе функционира Е-амбулантата ги открива проф. д-р Катарина Ставриќ, педијатар-имунолог од Универзитетската клиника за детски болести
♦♦♦♦♦♦♦
„Свесни сме за зголемување на бројката на заболени од коронавирус во изминативе денови, иако знаеме дека децата ја поминуваат болеста асимптоматски, но може да учествуваат во пренесување на вирусот на оние деца со хронични заболувања кои се во ризична група и се лекуваат на Клиниката. За таа цел, Клиниката за детски болести во тек на јуни преку Мој термин ќе отпочне со Е-амбуланта. Тоа подразбира дека матичните доктори ќе може да закажат консултативен преглед со одреден супспецијалист. Тоа ќе биде телефонска консултација на доктор со доктор“, објаснува проф. д-р Ставриќ.
Слушнете се по телефон со вашиот матичен лекар
Таа апелира до пациентите доколку сметаат дека имаат проблем за којшто им треба супспецијалистичка консултација од Детската клиника да се консултираат со нивните матични лекари за да може да се закаже таков телефонски консултативен преглед. „Слушнете се по телефон со вашиот матичен лекар, помогнете му да ја подготви медицинската документација за да може тие информации да ги прикачи кон упатот. Како резултат на таа телефонска консултација, супспецијалистите од Клиниката може да дадат совети за некои дополнителни испитувања од страна на матичниот лекар или од специјалист педијатар на секундарно болничко ниво, да дадат совет за понатамошна грижа за детето, а доколку се процени дека детето треба и да се види од страна на супспецијалист, тогаш во договор со матичниот доктор ќе се закаже термин кога да дојде детето на Клиника. Сето тоа ќе биде евидентирано во извештајот“.
При посета на Клиниката да се почитуваат правилата
„Доколку има потреба од преглед на Клиника, преку матичниот лекар ќе се закаже термин за преглед на детето. Многу е важно при тие посети на Клиниката да се почитуваат правилата – да дојде еден родител со детето, да носат маски, да ги почитуваат советите на медицинските сестри кои ќе ги пречекаат на влезот. Ќе се провери дали маската е правилно поставена, ќе се измери температура, ќе се направи дезинфекција на рацете и ќе се земе епидемиолошка анкета.
Како резултат на таа телефонска консултација, супспецијалистите од Клиниката може да дадат совети за некои дополнителни испитувања од страна на матичниот лекар или од специјалист педијатар на секундарно болничко ниво, да дадат совет за понатамошна грижа за детето, а доколку се процени дека детето треба и да се види од страна на супспецијалист, тогаш во договор со матичниот доктор ќе се закаже термин кога да дојде детето на Клиника
За епидемиолошката анкета е многу важно да се дадат точни информации за болест или контакт. Не е страшно и ако некој заболел од Ковид-19, но навистина е важно пред се, за безбедноста на детето, но и за безбедноста на другите деца на Клиниката, родителите да даваат точни информации.
Во чекалната се води сметка да се запази дистанца од 2 метри. За таа цел има обележани места каде да стојат и доколку сестрата примети поголемо присуство може да замоли некои пациенти да излезат и да почекаат надвор, а кога ќе дојде редот за консултација ќе ги повика да влезат во ординацијата“, објаснува проф. д-р Ставриќ.
Клиниката работи 24 часа за итни случаи
„Секако дека Клиниката работи 24 часа за итни случаи, како и досега, матичните лекари издаваа итни упати и децата доаѓаа на Клиниката доколку имаа потреба. Фебрилни деца со знаци за акутна инфекција и понатаму се третираат на Институт за белодробни болести Козле.
Во изминатиот период Клиниката обезбедуваше здравствена грижа на децата кои имаа потреба од супспецијалистичка консултација. Во консултација со педијатрите беа прифаќани на Клиниката за дополнителни специфични иследувања, пациентите со хронични болести постојано се во контакт со своите доктори од Клиниката како за следење на болеста така и за примање на специфична терапија. Целата подготовка и комуникација со родителите и со докторите се одвива преку телефон пред да бидат примени децата за преглед и хоспитализација“, вели проф. д-р Ставриќ.
Таа апелира да се почитуваат мерките кои Клиниката за детски болести ги презема за да се обезбеди безбедноста на децата кои пристапуваат на Клиниката. „Да бидеме внимателни и сите да ги спроведуваме препораките за заштита, а тоа е носење маски, миење на раце и одржување на дистанца од 2 метри“, потенцира проф. д-р Ставриќ.
