Климатските промени го полнат воздухот со полен, што е проблем дури и за луѓето кои никогаш не биле алергични, а состојбата ќе станува уште полоша – американските медиуми веќе се подготвуваат за „алергиска апокалипса“.
Секоја пролет почнуваат маките со алергиите, но се чини дека симптомите навистина се влошуваат.
„Луѓето кои се борат со сезонски алергии можеби веќе забележале дека симптомите на алергија почнуваат порано, траат подолго и се поинтензивни отколку пред неколку години. Обвинете ги климатските промени“, вели Кенет Мендез, извршен директор на Американската фондација за астма и алергија.
Толку е едноставно: сезоната на алергии станува подолга и поинтензивна бидејќи растенијата произведуваат повеќе полен во текот на подолг период. Меѓутоа, проблемот не е само во тоа што повисоките температури ја продолжуваат сезоната на растење на растенијата, туку и самиот јаглерод диоксид го поттикнува производството на полен.
Меѓу препорачаните начини за борба против алергиите се адекватни лекови, чистење на синусите, планирање на времето на отворено, начини за намалување на поленот во домот, како и алергиска имунотерапија
Американската фондација за астма и алергија цитира неколку студии кои покажале дека повисоките нивоа на CO2 се директно поврзани со повисоките нивоа на полен. Ако едното оди нагоре, оди и другото.
„Би помислиле дека ако сте на село опкружени со дрвја или цвеќиња, алергиите би биле поинтензивни, но во градовите е всушност полошо“, рече Мендез.
„Тоа е затоа што влијанието на климатските промени се зголемува и затоа што е многу потопло. Се должи на фактот дека има загадувачи, повеќе CO2 и озон. Сето ова промовира поинтензивно ослободување на полен“.
Во споредба со пред три децении, сезоната на полен во Северна Америка сега започнува околу 20 дена порано, трае околу осум дена подолго и вклучува 21 отсто повеќе полен, според истражувањето објавено во списанието PNAS, пишува „The Atlantic“.
И ќе станува се полошо. Се очекува климатските промени и зголемените емисии на јаглерод диоксид да го стимулираат растот на дрвјата и тревите во многу региони, што ќе значи и повисоки концентрации на полен.
„Не можете целосно да го избегнете поленот, но постојат начини да ги ублажите симптомите. И можеби ќе треба да ги преземете тие чекори малку порано секоја година“, рече Мендез, а пренесува „Њујорк Тајмс“.
Меѓу препорачаните начини за борба против алергиите се адекватни лекови, чистење на синусите, планирање на времето на отворено, начини за намалување на поленот во домот, како и алергиска имунотерапија.
