Децата зачнати преку медицинско потпомогнато оплодување поминуваат подобро на училиште, но имаат малку поголема веројатност да имаат проблеми со менталното здравје до доцните тинејџерски години, покажува новото истражување предводено од истражувачите од UCL и Универзитетот во Хелсинки.
Истражувањето набљудувало 280.000 деца родени во Финска помеѓу 1995 и 2000 година се додека не наполниле 18 години. Истражувачите ги споредиле бебињата родени со помош на техники за асистирана репродукција, како што се ин витро фертилизација (IVF), вештачко оплодување и индукција на овулација, со оние родени кои биле зачнати по природен пат.
Истражувачите откриле дека децата зачнати со методи на асистирана репродукција имале подобар успех на училиште и помали шанси да го напуштат образованието, како и поголеми шанси за вработување во споредба со природно зачнатите деца, иако експертите признаа дека надворешните фактори може да имаат поголемо влијание врз тоа отколку методот на зачнување.
По разгледувањето на семејните околности, студијата открила дека децата од првата група се изложени на зголемен ризик од развој на нарушувања на менталното здравје, особено анксиозност или депресија, бидејќи било откриено дека на дури 10 отсто од адолесцентите во таа група им биле дијагностицирани ментални нарушувања на возраст од 16 до 18 години.
За споредба, на 9 отсто од природно зачнатите адолесценти до истата возраст им биле дијагностицирани ментални нарушувања.
Студијата е објавена во „European Journal of Population“.
