ПИШУВА:
Катерина Шекеровска-Димовска
katerina@pedijatar.mk
На 13 април, во хотелот „DoubleTree by Hilton“ во Скопје, во организација на најголемата очна групација во земјава, „Промедика“ и „Систина офталмологија“, ќе се одржи научно-стручен симпозиум „Новини во офталмологијата во Македонија и во светот“. За програмата, деталите и целта на настанот разговараме со д-р Фанка Гилевска, специјалист офталмолог.
„Новини во офталмологијата во Македонија и во светот“ е насловен научно-стручниот симпозиум, кој ќе се одржи на 13 април, во хотелот „DoubleTree by Hilton“ во Скопје, во организација на најголемата очна групација во земјава, „Промедика“ и „Систина офталмологија“. Каква е агендата на симпозиумот и во колку сесии е конципирана програмата?
Д-р Гилевска: Симпозиумот се состои од 5 сесии, во кои се опфатени речиси сите офталмолошки сегменти. Почнува со сесијата за катарактна хирургија, потоа сесијата за рефрактивна хирургија. Во сесијата за детска офталмологија и страбологија, д-р Викторија Филева ќе го претстави новиот и прв во Македонија специјализиран оддел за детска офталмологија и страбологија. Потоа следуваат сесиите за медикаментозен и хируршки третман на ретиналните болести.
Во светската офталмологија, годишно се одржуваат два најголеми настани и низа помали специјализирани конгреси. Единствен начин да сите бидеме информирани што се случува во светот на нашата професија, е преку вакви симпозиуми, да си ги споделиме информациите и да разговараме што од новото е применливо во нашата земја. Сметаме дека е многу важно да имаме гласни отворени дебати, затоа што медицината низ клиничките студии и медицината во пракса се разликува, а на овие средби се зборува токму за клиничната пракса
Кои се предавачите на симпозиумот и дали истиот вклучува и учество на колеги надвор од земјава?
Д-р Гилевска: На симпозиумот ќе предаваат само дел од офталмолозите на Систина офталмологија/Промедика офталмологија тимот. Ќе имаме гости, колеги од соседните земји кои се истовремено и наши соработници, пријатели. Цел ни е да поттикнеме дебата на тема стручни прашања, со цел да го подобриме и нашето работење и да се самопровериме до каде сме. Особена чест ми е да најавам дека проф. Татјана Јосифовска, која долги години работи во Швајцарија, а прв пат по нејзиното заминување прифаќа гостување на македонски настан.
Во рамки на симпозиумот ќе биде одржана и работилница WET-LAB. За што конкретно станува збор?
Д-р Гилевска: Работилницата е место за собир на тие офталмолози чиј главен интерес е дијабетичната ретинопатија, сенилната макуларна дегенерација и другите ретинални болести кои се лекуваат со апликација на анти – ВЕГФ инјекции. Сакаме да ја отвориме идејата за апликација на анти – ВЕГФ инјекциите и низ другите градови во нашата земја, а со тоа да го подобриме третманот на тие болести, кои всушност можат да се лекуваат и ако се лекуваат навреме имаат одлични резултати по видот на пациентите.
Симпозиумот е акредитиран од Лекарската комора на Македонија, а учеството е бесплатно. Каде може да се пријават заинтересираните?
Д-р Гилевска: Сите специјалисти офталмолози, вклучувајќи ги и специјализантите се лично поканети од страна на најголемата групација на очни болници, „Промедика“ и „Систина офталмологија“. Учеството е бесплатно за сите офталмолози, а симпозиумот е акредитиран од страна на Лекарска комора на Македонија со максимален број на бодови за слушатели и предавачи.
Која е целта на организацијата на овие настани и што всушност значи нивното одржување за фелата, а секако понатаму и за пациентите кои имаат потреба од офталмолошки третмани?
Д-р Гилевска: Во светската офталмологија, годишно се одржуваат два најголеми настани и низа помали специјализирани конгреси. Единствен начин да сите бидеме информирани што се случува во светот на нашата професија, е преку вакви симпозиуми, да си ги споделиме информациите и да разговараме што од новото е применливо во нашата земја. Сметаме дека е многу важно да имаме гласни отворени дебати, затоа што медицината низ клиничките студии и медицината во пракса се разликува, а на овие средби се зборува токму за клиничната пракса. Преку приказ на примената на нова оперативната техника, вистинското задоволство на пациентот со имплантирани леќи од одреден тип, или правиот број на интравитреални инјекции кои треба да се аплицираат за успешно лекување на некоја ретинална болест, добиваме попрецизна информација која утре можеме да ја поделиме со пациентот.
