ПИШУВА:
Катерина Шекеровска-Димовска
katerina@pedijatar.mk
Првиот интернационален симпозиум за аритмии „RhythmMK 2025 – Нов милениум во електрофизиологија и срцева електростимулација“, кој се одржа викендов (30 мај-1 јуни) во хотелот „DoubleTree by Hilton“ во Скопје заврши исклучително успешно, надминувајќи ги очекувањата на организаторите, учесниците и гостите. Со повеќе од 300 присутни – доктори, кардиолози, интернисти, специјализанти, матични лекари, медицински сестри, техничари и студенти – симпозиумот беше значајна платформа за размена на знаења, искуства и иницијативи во областа на срцевите аритмии.
„RhythmMK 2025“ претставува важен чекор напред во развојот на аритмологијата како супспецијалност во нашата земја, отворајќи нови можности за стручна едукација, регионална соработка и вклучување во европски научни мрежи. Беспрекорната организација, точноста до минута, динамиката на сесиите, активното вклучување на младите лекари, како и партнерството со Европската асоцијација за срцев ритам (EHRA), се само дел од карактеристиките што го издвојуваат „RhythmMK 2025“ како исклучителен настан со европски стандарди. За концептот и подготовките, за предизвиците со кои се соочи организацискиот тим, за највпечатливите моменти од симпозиумот, реакциите на учесниците и визијата за иднината на овој значаен научен собир, разговараме со проф. д-р Лидија Попоска, претседателка на Организациониот одбор на „RhythmMK 2025“.
Каква е Вашата генерална оценка за „RhythmMK 2025“ и дали симпозиумот ги исполни очекувањата што си ги поставивте како организатори?
Проф. д-р Попоска: Се уште ги сумираме впечатоците од овие три дена – споделување на наука, искуства, креирање на нови релации со колегите надвор од Македонија, и ДА, можам да кажам дека позади нас е еден успешен симпозиум. Симпозиумот ги исполни нашите очекувања, како организатори ние точно знаевме што правиме и што сакаме да постигнеме во тек на подготовките, кои започнаа во септември 2024 година, кога ја дадовме и првата објава за „Rhythm MK“.
Странските предавачи и гости беа воодушевени од посетеноста на симпозиумот и истото гласно го разговараа, барајќи совет од нас како да постапат за да ја зголемат заинтересираноста и посетеноста на нивните национални или регионални собири од различен тип
Но, задоволство ми е да напоменам дека, според коментарите на учесниците од Македонија и надвор од неа, коментарите на гостите, коментарите на компаниите – производители на медицински помагала и апарати, кои имаа прилика да се претстават во тек на симпозиумот, „Rhythm MK“ ги надмина очекувањата на сите.
Со оглед на обемот и значењето на симпозиумот, колку беше предизвик целата негова организација и што лично, но и како тим ќе понесете како најголемо искуство од овој настан?
Проф. д-р Попоска: Мојот принцип на работа во животот е дека најголемите грешки се прават кога за нешто не си даваме доволно време. Идејата за симпозиум кој ќе биде посветен на нарушувања на срцевиот ритам, се роди во ноември 2023 година, некако заедно со идејата да се формира „ТИМ АРИТМИИ“. Првата задача на Тимот аритмии беше да се фокусираме на зголемување на обемот и квалитетот на нашата медицинска пракса, што резултираше со воведување на нови методи во работа, и зголемување на волуменот на работа. Втората задача на тимот беше да се привлечат во што поголем број млади доктори во една област од кардиологијата, која е можеби најинтересна, но за сметка на тоа бара надоградување на медицинското знаење и вештини, во тек на целиот живот.
Во тек на симпозиумот „RhythmMK“ имавме заедничка сесија со Европската асоцијација за срцев ритам (EHRA- European Heart Rhythm Association), која беше токму на тема, како да се доближи можноста за лекување на срцевите аритмии во малите земји како нашата на ниво на големите европски центри и како да се доближи можноста за едукација и размена на искуства на нашите доктори со колегите од другите држави
После година дена од формирање на Тимот аритмии решивме во септември 2024 година да започнеме со организирање и на првиот симпозиум, со меѓународно учество и одбравме име за истиот – „RhythmMK“. Техничкиот дел во организацијата го оставивме на професионалците од тоа поле, наша задача беше да обезбедиме добри предавачи и да ги вклучиме со активно учество сите млади доктори кои се заинтересирани за делот аритмии од кардиологијата.
Задоволство ми е да напоменам дека според коментарите на учесниците од Македонија и надвор од неа, коментарите на гостите, коментарите на компаниите – производители на медицински помагала и апарати, кои имаа прилика да се претстават во тек на симпозиумот – „Rhythm MK“ ги надмина очекувањата на сите
Колку учесници присуствуваа на симпозиумот и какви беа реакциите, впечатоците на странските предавачи и гости?
Проф. д-р Попоска: На „RhythmMK“ присуствуваа повеќе од 300 доктори, кардиолози, интернисти, доктори во тек на специјализација кардиологија или интерна медицина, матични доктори, дури и една група на студенти по медицина, но и медицински сестри и техничари кои имаа во тек на симпозиумот своја сесија.
Странските предавачи и гости беа воодушевени од посетеноста на симпозиумот и истото гласно го разговараа, барајќи совет од нас како да постапат за да ја зголемат заинтересираноста и посетеноста на нивните национални или регионални собири од различен тип. Се разговараше за квалитетот на нашите млади доктори, нивната посветеност на науката и нивната комуникативност. Како многу позитивно беше оценето почитувањето на тајмингот на предавањата и сесиите. Не се соочивме во ниту еден од деновите со некакво доцнење или испуштање на термини за дискусија, заради продолжување на презентациите.
Во тек на овие три дена не послужи и времето, беше сончево и топло и гостите имаа прилика, иако многу кратко, малку да го видат Скопје и да ја почувствуваат нашата гостопримливост, нашата вкусна храна и нашите вина.
Сите гости изразија желба да дојдат повторно, што за нас претставува најголемо признание дека сме немале пропусти во организацијата.
Како наш гостин на симпозиумот предавање одржа проф. Даниел Шер, актуелниот претседател на Комитетот за национални здруженија при EHRA, како и актуелниот претседател на Комитетот за електронска комуникација, Стефан Симовиќ. Беа претставени електронските платформи за учење, кои се достапни за сите доктори кои ќе се зачленат во EHRA и имаат желба за понатамошно секојдневно напредување
Дали од симпозиумот произлегоа конкретни иницијативи за научна соработка или заеднички проекти, особено во делот на истражување на срцевите аритмии? Кои се главните заклучоци од „RhythmMK 2025“?
Проф. д-р Попоска: Во тек на симпозиумот „RhythmMK“ имавме заедничка сесија со Европската асоцијација за срцев ритам (EHRA- European Heart Rhythm Association), која беше токму на тема, како да се доближи можноста за лекување на срцевите аритмии во малите земји како нашата на ниво на големите европски центри и како да се доближи можноста за едукација и размена на искуства на нашите доктори со колегите од другите држави.
Како наш гостин на симпозиумот предавање одржа проф. Даниел Шер, актуелниот претседател на Комитетот за национални здруженија при EHRA, како и актуелниот претседател на Комитетот за електронска комуникација, Стефан Симовиќ. Беа претставени електронските платформи за учење, кои се достапни за сите доктори кои ќе се зачленат во EHRA и имаат желба за понатамошно секојдневно напредување.
Како многу позитивно беше оценето почитувањето на тајмингот на предавањата и сесиите. Не се соочивме во ниту еден од деновите со некакво доцнење или испуштање на термини за дискусија, заради продолжување на презентациите
Проф. Даниел Шер и д-р Стефан Симовиќ одржаа состанок со претседателот на Македонското кардиолошко здружение, проф. д-р Јорго Костов и претседателот на Работната група за аритмии доц. д-р Јане Талески во тек на кој се разгледуваа можностите за понатамошни заеднички активности, научна работа и вклучување на нашата држава во меѓународни проекти.
На свеченото отворање беше истакнато дека се планира симпозиумот да стане традиционален. Дали веќе размислувате за концептот на „RhythmMK 2026“?
Проф. д-р Попоска: Не. Не. Македонија е мала држава, со мал број на кардиолошки центри и навистина за една година нема да има толку многу нови сознанија во аритмологијата, кои треба да се споделат. Кардиолошките конгреси во Македонија се одржуваат секои четири години. Последниот се одржа во 2023 година, а следниот се планира за 2027 година. Ние би биле среќни доколку „RhythmMK“ би се одржувал на секои четири години, точно помеѓу два кардиолошки конгреси. Но, доколку нашиот тим расте, согласно нашиот ентузијазам, можеби и овој прелиминарен план би се променил и вториот „RhythmMK“ би дошол порано од планираното.
