ПИШУВА:
Катерина Шекеровска-Димовска
katerina@pedijatar.mk
Аритмологијата е специјализирана гранка на кардиологијата, која се занимава со проучување, дијагностицирање и лекување на срцевите аритмии – нарушувања во нормалниот срцев ритам. „Пациентите со аритмии припаѓаат на сите возрасни групи, од најрано детство до крај на животот, некогаш со симптоми, некогаш без никакви симптоми до фатални збиднувања, како прва манифестација на аритмијата. Кога зборуваме за аритмии, можам да кажам дека нема двајца исти пациенти“, вели проф. д-р Лидија Попоска, претседателка на Организациониот одбор на Интернационалниот симпозиум за аритмии „RhythmMк 2025 – Нов милениум во електрофизиологија и срцева електростимулација“.
„RhythmMк 2025“ ќе се одржи од 30 мај до 1 јуни, во хотелот „DoubleTree by Hilton“ во Скопје и на едно место ќе обедини голем број на електрофизиолози, кардиолози, интернисти, специјализанти по кардиологија и интерна медицина, како и други доктори, медицински техничари и медицински професионалци со заеднички интерес – нарушувања на срцевиот ритам, нивна дијагноза и третман.
„RhythmMk 2025“ е прв интернационален симпозиум за аритмии што се организира во Македонија, и претставува значаен чекор напред за македонската кардиолошка, но и поширока медицинска заедница. Како се роди идејата за овој настан и кој стои зад неговата организација?
Проф. д-р Попоска: Да, прв под име „RhythmMк“. Инаку, првиот воопшто симпозиум за аритмии во Република Македонија се одржа во далечната 1998 година, во Охрид, во организација на проф. Лазар Србиновски, „таткото на електростимулацијата“ во Македонија. Низ годините потоа, вообичаено, делот за нарушувања на ритамот на срцето, од научен аспект, се инкорпорираше во склоп на кардиолошките конгреси, во организација на Здружението на кардиолози на Македонија.
Во текот на минатата година, Работната група за аритмии при Здружението, дојде до заклучок дека честотата на нарушувањата во ритам кај популацијата, воведувањето на нови методи на лекување, усовршувањето на веќе востановените методи, како и порастот на број на доктори кај кои потесен интерес е аритмологијата, бара настан на кој ќе бидат споделени нашите искуства, со искуствата на доктори од регионот и пошироко.
Која е целта на симпозиумот „RhythmMк 2025 – Нов милениум во електрофизиологија и срцева електростимулација“ и за кого е наменет?
Проф. д-р Попоска: Симпозиумот „RhythmMк“ е, пред се, наменет за младите доктори од државата и регионот. Аритмологијата како супспецијалност на кардиологијата се фокусира на дијагноза и третман на срцевите аритмии – нарушувања во срцевиот ритам. Таа опфаќа проценка на електричната активност на срцето, користење на неинвазивни и инвазивни дијагностички методи, како и примена на современи терапии: фармаколошки, електростимулација, катетер-аблација и вградување на уреди како пејсмејкери и дефибрилатори. Аритмологијата има клучна улога во превенција на срцева смрт и подобрување на квалитетот на живот кај пациенти со аритмии. Со технолошкиот напредок, оваа гранка станува сè пософистицирана, комбинирајќи клиничко искуство со врвна технологија за индивидуализиран пристап во лекувањето.
Симпозиумот ќе започне со ЕКГ квиз за младите доктори, каде во една релаксирана атмосфера, ќе се разговара за диференцијално-дијагностичките дилеми кај различни ЕКГ наоди, кои биле предизвик во различни клинички сценарија
Кога зборуваме за аритмии, можам да кажам дека нема двајца исти пациенти. Тоа бара голема посветеност на докторите кои работат во таа област, и наша цел е да привлечеме колку може повеќе млади доктори, кои се спремни да вложат огромен дел од своето работно и слободно време во надградување на своите вештини и своето знаење, и да бидат компетитивни во регионот и пошироко.
Токму поради комплексноста и уникатноста на нарушувањата во срцевиот ритам, важна е и комуникацијата помеѓу докторите, разменувањето на знаења, и приближувањето на експертите од другите држави до нашите колеги од Македонија.
Симпозиумот ќе трае три дена – што сè ќе биде опфатено во програмата, кои се темите и планираните активности? Дали се предвидени работилници, сесии за споделување на случаи?
Проф. д-р Попоска: Симпозиумот ќе започне со ЕКГ квиз за младите доктори, каде во една релаксирана атмосфера, ќе се разговара за диференцијално-дијагностичките дилеми кај различни ЕКГ наоди, кои биле предизвик во различни клинички сценарија.
Во тек на вториот ден опфатени се наши искуства и новини од делот на електростимулација и делот на електрофизиологија. Ќе се одржи здружена сесија со Европската асоцијација за ритам и срце, во која гостин ќе биде проф. Даниел Шер (Daniel Scherr), претседател на Комитетот на национални здруженија за ритам.
Аритмологот како доктор, не е само кардиолог, тој е и генетичар и спортски кардиолог и електроинженер. Тоа е доктор, кој деноноќно добива слики од ЕКГ наоди на сите комуникациски платформи и е спремен да помогне. Нашата цел е секако да пораснеме како тим на аритмолози, континуирано да се зголемува бројот на доктори и притоа да се зголемува експертизата со која располагаат
Во тек на овој ден гостуваат врвни експерти од областа на аритмологијата од Србија, Хрватска, Бугарија, Словенија, Италија, Германија, Романија и Австрија, со свои пленарни предавања или како модератори на сесии. Истиот ден на неколку пунктови ќе бидат достапни симулатори за електростимулација и електрофизиологија, каде младите доктори ќе имаат шанса виртуелно да се обидат да поставуваат електроди и катетри во срцевите шуплини, и да се обидат да програмираат апарати.
Освен постер-презентации, дел од младите доктори ќе имаат шанса и орално да ги презентираат своите истражувачки проекти или да прикажат интересни случаи од клиничката пракса.
Аритмологијата бара секогаш дополнување на кадрите, едукацијата од оваа област трае цел живот – како што претходно напоменав, нема двајца исти пациенти. Пациентите со аритмии припаѓаат на сите возрасни групи, од најрано детство до крај на животот, некогаш со симптоми, некогаш без никакви симптоми до фатални збиднувања, како прва манифестација на аритмијата
Какви се Вашите очекувања и дали се планира „RhythmMk“ да прерасне во редовен, традиционален настан?
Проф. д-р Попоска: Нашата примарна цел е да се пробуди интерес за аритмологија, кај докторите кои специјализирале или се во тек на специјализација по кардиологија. Аритмологијата бара секогаш дополнување на кадрите, едукацијата од оваа област трае цел живот – како што претходно напоменав, нема двајца исти пациенти. Пациентите со аритмии припаѓаат на сите возрасни групи, од најрано детство до крај на животот, некогаш со симптоми, некогаш без никакви симптоми до фатални збиднувања, како прва манифестација на аритмијата. Аритмологот како доктор, не е само кардиолог, тој е и генетичар и спортски кардиолог и електроинженер. Тоа е доктор, кој деноноќно добива слики од ЕКГ наоди на сите комуникациски платформи и е спремен да помогне.
Нашата цел е секако да пораснеме како тим на аритмолози, континуирано да се зголемува бројот на доктори и притоа да се зголемува експертизата со која располагаат.
Тоа само по себе, ќе донесе потреба овие симпозиуми да се повторуваат. За почеток, нашиот план е да се организира симпозиум за аритмии на секои четири години.
