ПИШУВА:
Катерина Шекеровска-Димовска
katerina@pedijatar.mk
„Мисијата на конгресот е да обезбеди стручна платформа за размена на знаења, искуства и најнови достигнувања во урологијата, преку унапредување на соработката меѓу националните и регионалните експерти, со цел постојано подобрување на дијагностиката, третманот и грижата за пациентите“, потенцира проф. д-р Скендер Саиди, претседател на Македонското здружение по урологија, во пресрет на 5. Конгрес на Македонското здружение по урологија (МАУ) и 3. Конгрес на Балканското здружение по урологија (БАУ), што ќе се одржи од 17 до 19 октомври 2025 година во хотелот „Дрим“ во Струга.
Професоре Саиди, во тек се подготовките за претстојниот Конгрес, кој оваа година ги обединува и националното и регионалното здружение по урологија. Кои се клучните теми и современи предизвици во урологијата што ќе бидат во фокусот на овој значаен собир?
Проф. д-р Саиди: Современата урологија се развива со забрзано темпо, благодарение на технолошкиот напредок кој значајно ги менува дијагностичките и терапевтските пристапи. Тоа создава потреба за континуирана едукација и стручна размена – токму тоа е и суштината на претстојниот конгрес.
Оваа година, особено сме горди на заедничката организација со националното и регионалното здружение по урологија, што овозможува збогатена научна програма и поширока размена на искуства.
Покрај реномираните домашни предавачи, особено значење на овогодинешниот конгрес ќе му даде присуството на истакнати имиња од меѓународната уролошка заедница. Своите знаења и искуства ќе ги споделат врвни експерти од Турција, Словенија, Бугарија, Албанија, Србија, Италија и Австрија, со што конгресот добива изразена регионална и интернационална димензија
Главни теми ќе бидат: карцином на мочниот меур, карцином на простатата, карцином на бубрегот, а дополнително ќе бидат опфатени и трансплантација на бубрези и реконструктивна урологија.
Која е мисијата на Конгресот?
Проф. д-р Саиди: Да обезбеди стручна платформа за размена на знаења, искуства и најнови достигнувања во урологијата, преку унапредување на соработката меѓу националните и регионалните експерти, со цел постојано подобрување на дијагностиката, третманот и грижата за пациентите.
Во последните години, урологијата се развива со забрзано темпо, благодарение на новите научни истражувања и напредните медицински технологии. Кои новитети или технолошки иновации ќе бидат претставени во Струга?
Проф. д-р Саиди: Во последните години, урологијата се движи кон сѐ порафинирани, прецизни и минимално инвазивни методи, кои значително го подобруваат квалитетот на лекувањето, како и постоперативното закрепнување на пациентите. На претстојниот конгрес во Струга ќе бидат претставени токму тие современи трендови, кои стануваат сѐ пошироко прифатени и применливи и кај нас.
Употреба на ласерот во урологијата – една од најзначајните иновации што ќе биде презентирана е ласерската терапија, особено во третманот на:
- Калкулоза (камчиња) на уринарниот тракт, каде ласерската литотрипсија овозможува дробење на камчињата со висока прецизност и ефикасност.
- Бенигна хиперплазија на простатата (BPH) – ласерската енуклеација на простата (HoLEP и други техники) станува златен стандард во многу центри, со одлични резултати и кратко време на опоравување.
Роботски и лапароскопски методи – овие методи се сѐ поактуелни кај радикалната простатектомија, нефректомија и пиелопластика, а интересот кај младите уролози расте, особено во делот на обука и симулации.
Може ли да ни откриете дел од предавачите и гостите? Кои се клучните имиња на кои особено се радувате, и што можеме да очекуваме од нивните излагања?
Проф. д-р Саиди: Секако, покрај реномираните домашни предавачи, особено значење на овогодинешниот конгрес ќе му даде присуството на истакнати имиња од меѓународната уролошка заедница. Своите знаења и искуства ќе ги споделат врвни експерти од Турција, Словенија, Бугарија, Албанија, Србија, Италија и Австрија, со што конгресот добива изразена регионална и интернационална димензија.
Оваа година особено сме горди на заедничката организација со националното и регионалното здружение по урологија, што овозможува збогатена научна програма и поширока размена на искуства
Меѓу меѓународните предавачи се издвојуваат:
- Проф. Волкан Тугџу (Турција), д-р Зоран Крстановски (Словенија) и д-р Зоран Анакиевски (Бугарија) – признати водечки имиња во областа на роботската и лапароскопската хирургија.
- Проф. д-р Атеш Кадиоглу (Турција) – светски признат андролог и еден од водечките авторитети во машката сексуална и репродуктивна медицина; проф. д-р Којовиќ (Србија) и проф. д-р Галиќи (Албанија) – истакнати во реконструктивната хирургија на уретрата.
- Проф. д-р Харун Фајковиќ (Австрија) – кој ќе говори за најновите и иновативни пристапи во современата уролошка терапија.
- Академик Живко Попов (РСМ) и проф. д-р Ајхан Динчкан (Турција) – познати по својата експертиза во областа на трансплантациската хирургија.
- Проф. д-р Оташ Дурутовиќ (Србија) – меѓународно признат експерт за лекување на уролитијаза, со значителен придонес во светската стручна литература.
Каква е важноста на мултидисциплинарниот пристап на овој конгрес – дали ќе бидат вклучени и други специјалности, како што се нефролози, онколози, радиолози, трансплантациски тимови?
Проф. д-р Саиди: Мултидисциплинарниот пристап на овој конгрес е од голема важност бидејќи овозможува интеграција на знаења и искуства од различни медицински области, што резултира со целосен и сеопфатен пристап кон пациентите и нивното лекување. Вклучувањето на различни специјалности како нефролози, онколози, радиолози и трансплантациски тимови е клучно за успешна размена на информации, подобрување на дијагностиката и третманот, како и за развој на нови интердисциплинарни протоколи и терапии.
Што би им порачале на помладите лекари и уролози кои ќе присуствуваат на Конгресот? Како да го искористат максимумот од овој настан – и стручно и лично?
Проф. д-р Саиди: На помладите лекари и уролози кои ќе присуствуваат на конгресот им порачувам: Искористете ја оваа уникатна можност максимално – бидете активни во сите делови од настанот! Вклучувајте се во дискусии, поставувајте прашања и споделувајте ги вашите мислења и искуства.
Се надевам дека овој конгрес ќе стане традиционален собир кој секоја година ќе ја зближува нашата стручна заедница и ќе ја поттикнува соработката меѓу различните специјалности
Активното учество ќе ви помогне да научите повеќе и да изградите важни професионални врски. Особено е важно да учествувате со свои апстракти и истражувања, бидејќи тие ќе бидат објавени во книгата на апстракти. Ова е одлична шанса да го истакнете својот труд и да се претставите пред пошироката стручна јавност, што значи значаен чекор во вашето професионално реноме и развој. Покрај стручниот аспект, искористете ја можноста да запознаете колеги, да се инспирирате и да изградите пријателства кои ќе ви помагаат во вашата кариера. Бидете отворени, амбициозни и мотивирани – на овој конгрес ви се отвора пат кон нови знаења и предизвици!
Конечно, кои се Вашите очекувања од претстојниот конгрес?
Проф. д-р Саиди: Моите очекувања од претстојниот конгрес се да се постигне поголемо учество на стручната јавност, со цел да се обезбеди богата и квалитетна размена на знаења и искуства. Очекувам да слушнеме интересни, актуелни и значајни предавања кои ќе придонесат кон унапредување на нашата професија и клиничката пракса. Исто така, се надевам дека овој конгрес ќе стане традиционален собир кој секоја година ќе ја зближува нашата стручна заедница и ќе ја поттикнува соработката меѓу различните специјалности.
Со нетрпение очекувам да учествувам и да придонесам во развојот на урологијата преку овој значаен настан.
