ПИШУВА:
Катерина Шекеровска-Димовска
katerina@pedijatar.mk
Извонредна организација, врвни предавања и размена на искуства го одбележаа третиот симпозиум на Педијатриското респираторно здружение – ПЕДИАРЕС, што се одржа од 25 до 27 април во Струга. Под мотото „Новини во педијатриска пулмологија“, настанот собра над 280 учесници и 45 предавачи, од кои дури 24 од странство, кои преку богата тридневна програма понудија нови сознанија, клинички пристапи и дискусии од областа на педијатриската пулмологија и алергологија, микробиологија, оториноларингологија и детска хирургија, а меѓу темите се најдоа и загадувањето и имунизацијата на децата, која е клучна во зачувувањето на нивното здравје, но и заштита на населението од заразни болести.
„Навистина сум задоволна од тоа како протекоа трите симпозиумски денови. Добивме голем број на честитки и позитивни коментари за време на траењето и по завршувањето на симпозиумот, што е дополнителна мотивација за ПЕДИАРЕС да организира нови стручни настани“, ни изјави проф. д-р Татјана Јаќовска, претседателка на Педијатриско респираторно здружение – ПЕДИАРЕС.
Деновиве во Струга, во хотелот „Дрим“, се одржа третиот симпозиум на Педијатриско респираторно здружение (ПЕДИАРЕС), насловен „Новини во педијатриска пулмологија“. Огромниот интерес и полните сали уште еднаш докажаа колку стручната јавност е гладна за нови знаења и искуства. Во каква атмосфера помина симпозиумот и какви се Вашите впечатоци по неговото завршување?
Проф. д-р Јаќовска: Третиот симпозиум со меѓународно учество „Новини во педијатриска пулмологија“, организиран од страна на Педијатриско респираторно здружение – ПЕДИАРЕС се одржа во периодот од 25 до 27.4.2025 во хотелот „Дрим“, во Струга. На симпозиумот учествуваа над 280 лекари. Заедно со научниот и организациониот одбор се погриживме овој симпозиум да биде исклучително добро организиран и да заработи бројни пофалби од учесниците. На симпозиумот покрај пленарните предавања и постер сесија имаше и сателитски симпозиуми. Научната програма беше поделена во три дена и опфаќаше теми од областа на педијатриската пулмологија и алергологија, микробиологија, оториноларингологија и хирургија.
Добивме голем број на честитки и позитивни коментари за време на траењето и по завршувањето на симпозиумот, што е дополнителна мотивација за ПЕДИАРЕС да организира нови стручни настани. 280 котизации, 45 предавачи од кои 24 беа надвор од земјава, 50 предавачи на апстракти… – станува збор за навистина голем број на доктори кои ги презентираа своите искуства и придонесоа за едукација на колегите
Што Ви остави најсилен впечаток и кои теми предизвикаа најголем интерес кај учесниците?
Проф. д-р Јаќовска: Третиот симпозиум на ПЕДИАРЕС мина во прекрасна атмосфера, а го одбележаа врвни предавачи од земјава и странство, кои ги изнесоа своите искуства и ставови во дијагностика и лечење на повеќе патолошки состојби. Симпозиумот стартуваше со научна програма од областа на загадувањето и имунизацијата, а на вакцините беше ставен посебен акцент, со што уште еднаш се потенцираше дека вакцинирањето е начин на кој можеме да се заштитиме себеси и нашите семејства, а имунизацијата на децата е клучна за зачувување на нивното здравје и благосостојба, како и за заштита на целото население од заразни болести. По работниот дел на првиот ден на симпозиумот следуваше и свечено отворање на настанот и коктел за добредојде.
На симпозиумот се презентираа новини, нови препораки, имаше размена на искуства, поставување на протоколи, претставување на нови процедури, се надополни знаењето на сите колеги, се воспоставија лични контакти и веќе се направија договори за посета на одредени центри надвор од земјата и продлабочување на знаењата
Огромна посетеност беше забележана и на вториот симпозиумски ден, кој мина во знакот на предавањата на кои беа презентирани искуства и новини во дијагностиката и терапијата на полето на алергиите, респираторните инфекции и ретките болести како цистична фиброза. Последниот, трет ден, го одбележаа две сесии посветени на туберкулоза и микробиом во детската возраст во кои доминираа врвни предавачи од регионот, а беа претставени и над 50 постер презентации.
Какви беа реакциите и коментарите од колегите по завршувањето на симпозиумот?
Проф. д-р Јаќовска: Навистина сум задоволна од тоа како протекоа трите симпозиумски денови. Добивме голем број на честитки и позитивни коментари за време на траењето и по завршувањето на симпозиумот, што е дополнителна мотивација за ПЕДИАРЕС да организира нови стручни настани. 280 котизации, 45 предавачи од кои 24 беа надвор од земјава, 50 предавачи на апстракти… – станува збор за навистина голем број на доктори кои ги презентираа своите искуства и придонесоа за едукација на колегите.
Кои се главните заклучоци и како новостекнатите знаења ќе ја унапредат секојдневната пракса и грижа за најмладите пациенти?
Проф. д-р Јаќовска: На симпозиумот се презентираа новини, нови препораки, имаше размена на искуства, поставување на протоколи, претставување на нови процедури, се надополни знаењето на сите колеги, се воспоставија лични контакти и веќе се направија договори за посета на одредени центри надвор од земјата и продлабочување на знаењата.
Што би издвоиле како најголем успех на симпозиумот?
Проф. д-р Јаќовска: Огромната посетеност на симпозиумот и полните сали, активното учество на колегите, нивното задоволство со интересните теми и предавања се најголемиот успех за нас како организатори.
Размислувате ли веќе за наредниот симпозиум на ПЕДИАРЕС? Што би сакале да подобрите или надградите, и кои нови теми би сакале да ги отворите во иднина?
Проф. д-р Јаќовска: Педијатриското респираторно здружение – ПЕДИАРЕС и понатаму ќе продолжи да работи во интерес на заедничка едукација и унапредување на здравјето на пациентите. Планирани се нови активности како стручни состаноци и работилници, а понатаму ќе следи конгрес.
