Унгарско-американската биохемичарка Каталин Карико е овогодинешната добитничка на Нобеловата награда за физиологија или медицина. Нејзиното истражување со Дру Вајсман, со која ја дели наградата, ги постави темелите за развој на вакцината против коронавирус, која беше развиена од BioNTech-Pfizer и Moderna.
Кариерата на оваа научничка служи како лекција за истрајност. И покрај тоа што била четири пати деградирана, таа никогаш не го променила својот фокус. Постојаниот, иако мал, напредок бил вреден за нејзината работа до ситните ноќни часови.
„Се чувствував успешна дури и кога другите ме сметаа за неуспешна бидејќи имав целосна контрола врз она што го правам“, рече таа.
Нејзината упорност и самодоверба не ја направиле само добар научник. Овие квалитети ја направиле и добар родител. Нејзината ќерка Сузан Франсиа е двократна освојувачка на златни олимписки медали. Исто така, магистрирала на Универзитетот во Пенсилванија и има МБА диплома од Универзитетот во Калифорнија, Лос Анџелес.
Кога луѓето ја прашуваат Карико како да ја балансираат кариерата и родителството, таа вели: „Само немојте претерано да помагате. Наместо да го галите детето, бидете му пример“.
„Детето е дел од семејството и има одговорности“
Додека растела, Франсиа била атлетски градена, но не се истакнувала во ниту еден спорт. Бидејќи е висока, многумина мислеле дека би можела да биде успешна во кошарката, но тоа не било случај. Сепак, како и нејзината мајка, таа била позитивна и упорна.
„Ги гледате вашите родители како се однесуваат еден со друг, како се однесуваат со бабите и дедовците, соседите и пријателите. А на училиште гледате како се однесуваат вашите учители. Тоа е она што ве обликува”
„Нејзините трофеи беа епитетите најнапредна или најголем ентузијаст од нејзините врсници“, објаснува Карико.
Овие квалитети се покажале корисни кога во втората година на студии се приклучила на веслачкиот тим. Набрзо завршила во американската сениорска веслачка репрезентација и во 2008 и 2012 година го освоила олимпиското злато.
Успехот на Франсиа не дојде од запишувањето на дополнителни часови или туторство, вели Карико. Тоа беше од гледањето како луѓето околу неа се одлучни и фокусирани.
„Ги гледате вашите родители како се однесуваат еден со друг, како се однесуваат со бабите и дедовците, соседите и пријателите. А на училиште гледате како се однесуваат вашите учители. Тоа е она што ве обликува”, смета Карико и истакнува дека гледањето родители кои се грижат и имаат позитивен мајндсет било поважно за изборот на Франсиа од кој било ресурс што може да се купи со пари.
Децата исто така чувствуваат гордост и независност кога имаат одредена автономија, додава нобеловката.
„Во 6 часот наутро бев во лабораторија бидејќи морав да го избегнам сообраќајниот метеж, а ќерка ми знаеше дека мора да стане, а понекогаш и да подготви појадок за мојот сопруг кој работеше до доцна и доаѓаше дома наутро. Детето е дел од семејството и има одговорности“, порачува нобеловката.
Децата ги прифаќаат вашите навики, а не зборовите, вели Карико. Најдобриот начин да одгледате издржливо дете е и самите да ја покажете таа особина.
