Традицијата продолжува – како и секоја година, членовите на британското кралско семејство, Кејт Мидлтон и принцот Вилијам, ја објавија фотографијата од нивното хармонично семејство, која ќе ја краси божиќната честитка. Фотографијата и овојпат ги освои симпатиите на јавноста, но ако досега главна ѕвезда беше принцезата Шарлот, овој пат таа му ја предаде „палката“ на нејзиниот помлад брат, двегодишниот принц Луис, чија палава насмевка ги воодушеви сите.
Најмладите членови, принцовите Џорџ (7) и Луис (2) и принцезата Шарлот (5) се во центарот на вниманието на божиќната честитка која ја сними фотографот Мет Портјус во нивната куќа во Норфолк, Анмер Хол.
„Војводата и војвотката од Кембриџ се среќни да споделат нова фотографија од своето семејство“, напиша нивниот портпарол во објавата.
Петчленото семејство позираше во удобни, топли џемпери на бали сено, додека зад нив стојат наредени цепени дрва. Сето ова и дава посебен шарм на целата фотографија.
