Светскиот ден на фармацевтите (World Pharmacists Day) се одбележува секој 25 септември, почнувајќи од 2009 година, од страна на Меѓународната фармацевтска федерација (FIP), со цел да се нагласи клучната улога на фармацевтите во здравствениот систем, нивниот придонес во унапредувањето на јавното здравје, рационалната и безбедна употреба на лекови, како и подобрувањето на квалитетот на животот.
„По повод Светскиот ден на фармацевтите – 25 септември, во име на Здружението на приватни аптеки на Република Северна Македонија (ЗПАРСМ) и во мое лично име, упатувам искрени честитки до сите фармацевти во нашата земја“, истакна м-р фарм. Џоана Андоноска, претседателка на Здружението на приватни аптеки на РС Македонија (ЗПАРСМ), во честитката до колегите по повод Светскиот ден на фармацевтите 2025.
Фармацевтите се едни од најдостапните здравствени професионалци, чија улога е од суштинско значење за безбедна, рационална и ефективна употреба на лековите, во насока на унапредување на здравјето, превенција на болести и подобрување на квалитетот на животот на населението.
„Само преку активна соработка, меѓусебна поддршка, континуирана едукација, заедничка визија и посветеност можеме да ја градиме и унапредуваме фармацевтската професија и да го покажеме нејзиното вистинско значење за општеството. На сите колеги фармацевти им посакувам многу успех, здравје и професионално исполнување. Нека овој ден биде потсетник за нашата важна улога и одговорноста што ја имаме кон пациентите и заедницата“, додаде м-р фарм. Андоноска.
„Мисли на здравје, мисли на фармацевт“ – тема на Светскиот ден на фармацевтите 2025
Кампањата „Мисли на здравје, мисли на фармацевт“ (Think Health, Think Pharmacist) е глобална иницијатива на Меѓународната фармацевтска федерација (FIP) за да ја нагласи клучната улога на фармацевтите во безбедната, ефикасна и достапна здравствена грижа.
Фармацевтите се едни од најдостапните здравствени професионалци, чија улога е од суштинско значење за безбедна, рационална и ефективна употреба на лековите, во насока на унапредување на здравјето, превенција на болести и подобрување на квалитетот на животот на населението
Од FIP предупредуваат дека буџетските ограничувања и недостигот на кадар во некои земји доведуваат до вработување неквалификувани лица, што може сериозно да го загрози здравјето на населението. „Фармација без фармацевт е ризик за пациентите,“ порачуваат од Федерацијата.
„‘Мисли на здравје, мисли на фармацевт’ е повеќе од кампања — тоа е повик за акција. Фармацевтите се клучни за безбедната употреба на лекови, управувањето со хронични заболувања и обезбедувањето здравствени услуги за јавноста. Инвестирањето во нив е инвестирање во посилни здравствени системи.“ – Пол Синклер, претседател на Меѓународната фармацевтска федерација (FIP)
Демографија на фармацевти
На глобално ниво, дури 65 % од фармацевтите се жени, а се очекува до 2030 година овој процент да порасне на 69 %. Родовиот сооднос, сепак, се разликува по региони.
На милион жители, Кипар (6,39) и Босна (3,71) имаат најголем број на фармацевтски факултети
Така, во африканскиот и во источномедитеранскиот регион поголем дел од фармацевтите се мажи, додека жените учествуваат со 48 %, односно 45 % од вкупната фармацевтска работна сила. Дополнително, податоците од 45 земји покажуваат дека 30,8 % од фармацевтите се помлади од 35 години.
Ризиците од замената на фармацевтите со необучени здравствени работници
Меѓународната фармацевтска федерација (FIP) ги потенцира и ризиците од замената на фармацевтите со необучени здравствени работници:
- Зголемени грешки при употреба на лекови и несакани реакции од лековите.
- Недоволно едуцирани пациенти и слабо придржување кон терапијата.
- Намалена меѓупрофесионална комуникација и координација на грижата.
- Поголеми трошоци за здравствена заштита и економска неефикасност.
- Негативно влијание врз хронични заболувања и јавното здравје.
- Ослабени модели на здравствена грижа базирани на вредности.
