Две фотографии на принцот Џорџ на кои тој и позира на својата мајка со широка, симпатична насмевка, беа објавени вчера, ден пред неговиот седми роденден, кој го прославува денеска.
Фотографиите ги направи неговата мајка, војвотката од Кембриџ, Кејт Мидлтон на почетокот на овој месец, најверојатно во нивниот дом во Норфолк. Кенсингтонската палата објави дека принцот Вилијам и Кејт се пресреќни што можат да ги споделат фотографиите.
„Војводата и војвотката од Кембриџ се пресреќни што можат да споделат две нови фотографии на принцот Џорџ во пресрет на неговиот седми роденден“, се вели во соопштението на Кенсингтонската палата.
Трите деца на Вилијам и Кејт ретко може да се видат во јавноста, но стана традиција да се објавуваат некои фотографии направени од Кејт за специјални прилики. Додека Велика Британија ги прави првите чекори надвор од карантинот воведен поради COVID-19, веројатно е дека принцот Џорџ ќе го прослави роденденот дома. Џорџ е најстар од трите деца на Вилијам и Кејт, неговата сестра Шарлот има 5 години, а братчето Луис две години.
