Сестринската професија е тешка затоа што бара сè од човекот: тело, ум, срце и душа. Но, истовремено е и благословена, затоа што секој ден сестрата има можност да направи разлика – да спаси, да утеши, да донесе надеж.
Секоја година на 12 мај, светот го слави Меѓународниот ден на медицинските сестри, кој ја одбележува годишнината од раѓањето на Флоренс Најтингејл (1820–1910), која се смета за пионер на модерното сестринство. Денот оддава почит на клучните улоги што ги имаат медицинските сестри во здравството, општеството и светската економија.
На 12 мај светот застанува во чест на луѓето кои често се невидливи херои на здравствениот систем – медицинските сестри. Овој ден е посветен на нивниот несебичен труд, нивната грижа и човечност, кои секојдневно го враќаат достоинството и надежта кај пациентите.
Тема за 2025: „Нашите сестри. Нашата иднина. Грижата за сестрите ги зајакнува економиите“
Секоја година, Меѓународен совет на медицински сестри – ICN избира тема за Меѓународниот ден на медицинските сестри што се фокусира на важни проблеми што влијаат врз медицинските сестри и здравствените системи низ целиот свет. Овие теми имаат за цел да ја зголемат свеста, да промовираат подобри услови за работа и да ја нагласат клучната улога што ја играат медицинските сестри во обезбедувањето висококвалитетна здравствена заштита и подобрувањето на резултатите кај пациентите.
Секоја година на 12 мај, светот го слави Меѓународниот ден на медицинските сестри, кој ја одбележува годишнината од раѓањето на Флоренс Најтингејл (1820–1910), која се смета за пионер на модерното сестринство. Денот оддава почит на клучните улоги што ги имаат медицинските сестри во здравството, општеството и светската економија
Темата за 2025 гласи: „Нашите сестри. Нашата иднина. Грижата за сестрите ги зајакнува економиите“. Оваа порака не е обична – таа е повик за будење. Не потсетува дека, додека ние спиеме, некој будно бдее над нас. Дека, додека се бориме со болка или страв, некоја сестра тивко ќе ни ја стегне раката и ќе каже: „Сè ќе биде во ред“. Но, кој се грижи за оние што се грижат? Токму затоа, темата за 2025 година го става фокусот на благосостојбата, менталното здравје и поддршката за медицинските сестри, зашто само сестра што е поддржана и почитувана може да даде најдобра грижа.
„Со темата за Меѓународниот ден на медицинските сестри 2025 ја истакнуваме важноста од поддршка на здравјето и благосостојбата на медицинските сестри, кои се од суштинско значење за функционирањето на здравствените системи ширум светот“, изјави д-р Памела Чипријано, претседателка на Меѓународниот совет на медицински сестри (ICN), објаснувајќи го изборот на темата за 2025 година.
„Медицинските сестри се соочуваат со бројни предизвици – физички, ментални, емотивни и етички – и неопходно е овие предизвици да се адресираат на начин што ќе го унапреди нивното севкупно здравје. Темата нуди можност да се изнесат конкретни, применливи решенија за да се поддржат сестрите во нивната секојдневна работа и да се подобри нивното долгорочно здравје. Таа ја засилува пораката од нашата Повелба за промени, со која апелираме до сите организации и влади да ги вреднуваат, заштитуваат, почитуваат и вложуваат во медицинските сестри, за одржлива иднина на сестринството и здравствената заштита“, додаде д-р Чипријано.
„Со темата за Меѓународниот ден на медицинските сестри 2025 ја истакнуваме важноста од поддршка на здравјето и благосостојбата на медицинските сестри, кои се од суштинско значење за функционирањето на здравствените системи ширум светот“,
д-р Памела Чипријано, претседателка на Меѓународниот совет на медицински сестри (ICN)
Почит и благодарност
Во болничка соба, на оддел за интензивна нега, во амбуланта или на терен – медицинските сестри не се само здравствени работници. Тие се гласот што смирува, лицето што охрабрува и раката што останува покрај нас во тешки мигови. Денес, на 12 Мај, да не ја заборавиме нивната сила. Да не ги земаме здраво за готово. Наместо тоа, да кажеме гласно и од срце: Ви благодариме!
Педијатриските медицински сестри – чувари на детското здравје и сигурност
Педијатриските медицински сестри играат круцијална улога во обезбедувањето здравје и благосостојба на доенчињата, децата и адолесцентите. Нивната важност ја надминува медицинската грижа—тие обезбедуваат емоционална поддршка, едукација и застапување за младите пациенти и нивните семејства.
Педијатриската сестра не е тука само за да измери температура, да даде терапија или да постави инфузија. Таа е тука да ги смири исплашените очиња, да го насмее детето што плаче, да му објасни на јазик разбирлив за неговата возраст што го очекува. Таа е мост помеѓу детето, родителите и здравствениот тим.
Работата на педијатриската сестра вклучува:
- Грижа за новороденчиња, доенчиња, деца и адолесценти – од рутинска здравствена заштита до критична нега.
- Поддршка на родителите – едукација, утеха, информирање и охрабрување во најстресните моменти.
- Следење на развој и раст – препознавање на развојни проблеми, рано интервенирање и насочување.
- Придонес во превенција – вакцинации, здравствени совети, промоција на здрави навики.
Работата со деца бара вештини што не се учат само на училиште и на факултет – туку се носат во срцето. Потребна е огромна емпатија, интуиција, разбирање на невербалната комуникација, и способност да се изгради доверба со дете за неколку секунди.
