Истражувачите откриле дека прекумерната употреба на цуцли лажливки влијае на развојот на јазичните вештини на доенчињата. Студијата опфатила 1.187 доенчиња во Осло, Норвешка, за да ги истражи импликациите врз говорот и јазикот од употребата на цуцла.
Се покажало дека децата кои почесто користат цуцла имаат помалку развиен вокабулар
Доенчињата биле поделени во две возрасни групи: 12-месечни и 24-месечни. Од родителите било побарано да дадат детални извештаи за тоа колку често нивните бебиња и деца користеле цуцли. Секој родител, исто така, пополнил и детален прашалник кој содржи листа на зборови што децата во одредени возрасни групи обично ги користат. Опсегот за 24-месечни деца во овој случај бил до 731 збор.
Се покажало дека децата кои почесто користат цуцла имаат помалку развиен вокабулар.
„Прекумерната употреба на цуцла лажливка може да го ограничи времето што доенчињата го поминуваат практикувајќи вербална комуникација, а тоа го попречува растот на нивниот вокабулар. На порана возраст, доенчињата со цуцла во устата имаат помалку можности за вежбање изговор на звуци и формирање на зборови, што е клучно за развивање јазични вештини“, пишува во заклучокот на норвешките научници.
Додека здравствените придобивки од употребата на цуцла лажливка, како што се ублажување на непријатноста и превенција на синдромот на ненадејна смрт на доенчиња, се широко поддржани, Американската академија на педијатриски стоматолози препорачува да се прекине употребата на цуцла до тригодишна возраст.
Сепак, до 85 проценти од доенчињата во западните земји користат цуцла лажливка во одреден момент од нивниот развој. Претходно постоеше загриженост дека цуцлите лажливки предизвикуваат зависност, како и дека ги оштетуваат забите и го зголемуваат ризикот од инфекции на средното уво.
