Единаесетгодишниот Илче, дете со церебрална парализа, чија приказна ја потресе земјава, после десеттина дена лекување и нега на Клиниката за детски болести заминува во мал групен дом.
„Илче здрав и расположен си заминува во мал групен дом. Неговата состојба кога беше хоспитализиран беше тешка, а денеска со надеж дека Илче ќе има шанса за подобар живот го испраќаме седнат расположен за игра и насмеан да влезе во новото семејство“, објави министерот за здравство доц. д-р Венко Филипче на својот ФБ профил.
Илче од Охрид по десеттина дена минати на Клиниката за детски болести успеа со плеснување на рачињата и едно големо браво да се збогува со тимот лекари кои се грижеа за него. „Огромна почит за сите здравствествени работници, тимот психолози, дефектолози, лекарите и сестрите кои цело време се грижеа за него!“, напиша министерот Филипче.
Приказната на Илче го привлече вниманието на јавноста откако медиумите објавија дека живее во нехумани услови, на чергиче на под, со една чаша млеко на ден и неискапен една година, напуштен од двајцата свои родители.
