Незапаметена трагедија го потресе Виетнам, а веста за трагичната смрт на 11-годишното момче го заобиколи светот.
Момче на училишна возраст почина во Виетнам откако неговиот мобилен телефон експлодирал и се запалил за време на онлајн настава. Единаесетгодишното момче, кое локалните медиуми го нарекоа „НВК“, следел онлајн час дома во провинцијата Нге Ан.
Додека го користел својот мобилен телефон, кој бил вклучен на полнење, уредот се запалил, изјави Ле Трунг Сон, виетнамски службеник за образование.
Момчето било зафатено од пламенот од неговиот телефон околу 16 часот, а соседите се обиделе да му помогнат. Итно бил пренесен во болница за да може да му се укаже помош, но набргу починал.
Носел слушалки
Поради епидемиолошките мерки против коронавирусот, наставата ја следел од дома. Носел слушалки кога му експлодирал мобилниот телефон, а облеката се запалила, пренесува „The Sun“.
Засега не е познато каков телефон или полнач користело момчето.
По инцидентот, локалните образовни службеници го посетиле домот на момчето и им изразиле сочувство на неговите родители. Децата во областа Нан Дан се вратија на училиште пред три недели, но како мерка на претпазливост поради Ковид-19 продолжија да посетуваат онлајн настава еднаш неделно. Полицијата ја истражува бизарната смрт на момчето.
