ПИШУВА:
Катерина Шекеровска-Димовска
katerina@pedijatar.mk
Со симболично пуштање на 30 балони денеска пред хотелот „Doubletree by Hilton“ во Скопје, каде што се одржува 5. Конгрес и 25. Симпозиум со меѓународно учество на Здружението на лекари по општа-семејна медицина (ЗЛОМ-СМ), пригодно беше одбележан 19 Мај – Светскиот ден на семејните лекари, кој оваа година се прославува под слоганот: „СЕМЕЈНИТЕ ЛЕКАРИ – СРЦЕТО НА ЗДРАВСТВОТО“.
„Денешниот ден 19 Мај е Светскиот ден на сите семејни лекари во Европа и во светот. Оваа година се одбележува под мотото „Семејните лекари се срцето на здравствената заштита“. Токму ние оваа година одлучивме да организираме голем конгрес посветен на хроничните незаразни заболувања во пост-Ковид пандемија“, истакна д-р сци. Драган Ѓорѓиевски, претседател на ЗЛОМ-СМ на денешната прес коференција. „Конгресот го посветивме на ова поради зголемувањето на бројот на хронични заболувања, пред се, на дијабетот, хипертензиите и аритмиите, како едни од најчестите заболувања, но и кај средната и младата популација точно предизвикани од самиот SARS-CoV-2 вирус. Конгресот трае четири дена, имаме голем број на светски гости, присутни, реномирани професори кои ќе изнесат свои европски согледувања се со цел да се подобри третманот на пациентите со хронични заболувања од страна на семејните лекари“, додаде д-р сци. Ѓорѓиевски пред присутните новинари, семејни лекари и гости.
На денешниот настан по повод одбележувањето на Светскиот ден на семејните лекари, симболично беа пуштени 30 балони, во чест на 25. Симпозиум и 5. Конгрес на Здружението на лекари по општа-семејна медицина (ЗЛОМ-СМ). На нив, како што објасни претседателот на ЗЛОМ-СМ беа закачени пораки што семејните лекари сакаат да им ги посочат на здравствените власти. „Па ако здравствените власти не не слушаат можеби Господ ќе не послуша да ни се исполнат желбите!“, додаде д-р сци. Ѓорѓиевски. На новинарско прашање што ќе се случи со здравството ако го нема срцето на здравствената заштита, тој додаде: „Ако го нема срцето и столбот на здравствената заштита можеме да добиеме колапс на здравствениот систем, затоа што се започнува и завршува со матичниот лекар!“
Честит ден на семејните лекари!
Прекрасна атмосфера на 5. Конгрес и 25. Симпозиум со меѓународно учество на Здружението на лекари по општа-семејна медицина (ЗЛОМ-СМ)
5. Конгрес и 25. Симпозиум со меѓународно учество на Здружението на лекари по општа-семејна медицина (ЗЛОМ-СМ) се одржува од 18 до 21 мај 2023 година во хотелот „DoubleTree by Hilton“ во Скопје. Настанот минува во прекрасна атмосфера и програма која изобилува со разновидни теми од голем број хронични незаразни заболувања, голем број на експерти од домашната, но и од меѓународната сцена ги презентираат новите сознанија и начини за третман на најчестите хронични болести.
- Главни теми на конгресот се: кардиоваскуларни заболувања, хематолошки, респираторни, ендокринолошки заболувања, како и постковид компликациите во интернистичките заболувања, но и во неврологијата и дерматовенерологијата, менталното здравје, како и слободните теми во кои се презентирани интересни прикази на случаи од секојдневната пракса.
Конгресот се одржува под мотото „Хронични незаразни заболувања во постковид пандемија“, а симпозиумот е посветен на назначајните ургенти состојби во семејната медицина како и начинот на нивниот третман. На конгресот и симпозиумот со свои предавања се претставуваат десетина експерти во своите области од нашата земја, како и дваесетина странски предавачи од Англија, Португалија, Словенија, Хрватска, Турција, Босна, Србија, Романија, Албанија и многу други земји.
