ПИШУВА:
Катерина Шекеровска-Димовска
katerina@pedijatar.mk
Под мотото „Здрава планета, здрави луѓе“ денеска во Градскиот парк во Скопје беше одбележан 19 Мај – Светски ден на семејниот лекар.
Во организација на Здружението на лекари по општа медицина – семејна медицина (ЗЛОМ-СМ), од 11 до 14 часот граѓаните можеа да измерат крвен притисок, гликемија и пикфлоуметрија, а истовремено и да добијат совети за здрави животни навики од специјалистите по семејна медицина.
„Денешниот ден, 19 мај е Светскиот ден на семејните лекари и овогодинешното мото на WONCA е „Здрави луѓе, здрава планета“. Всушност, светската WONCA заедно со здруженијата кои спаѓаат под неа ја подигнува кампањата против аерозагадувањето коешто е голем проблем речиси во целиот свет, и вториот момент е ниската здравствена култура за скрининг прегледи на населението. Токму затоа Здружението на лекари по општа и семејна медицина ЗЛОМ-СМ денеска организира акција во периодот од 11 до 14 часот за граѓаните и случајните минувачи на Градскиот парк кај Школка, за да ги повикаме да им измериме тензија, гликемија и да направиме пикфлоуметрија како би ги насочиле и би им дале здрави животни совети од семејните лекари, изјави д-р Драган Ѓорѓиевски, претседател на Здружението на општи и семејни лекари (ЗЛОМ-СМ).
Светскиот ден на семејниот лекар се одбележува на 19-ти мај секоја година. Овој ден е инициран од Светската организација на семејните лекари (WONCA) во 2010 година со цел да се истакне значајната улога на семејните лекари во здравствениот систем и да се подигне свесноста за нивната работа и придонес
„Во оваа прилика сакам да го честитам Денот на семејна медицина на сите колеги, специјалисти по семејна медицина и матични лекари коишто сме првата линија и столбот на здравствениот систем“, додаде д-р Ѓорѓиевски.
„Доволно е на 6 месеци да се направи комплетна лабораторија, секој пациент да си го посети својот матичен лекар, да измери притисок, гликемија и да направи комплетна лабораторија врз основа на некој показател. Некако сме навикнати пациентот да доаѓа на лекар само во тешки состојби или во екстремно лесни состојби“
Д-р Драган Ѓорѓиевски, претседател на Здружението на општи и семејни лекари (ЗЛОМ-СМ)
Во Градскиот парк денеска беше раздвижено. Дел од посетителите и случајни минувачи застанаа во ред да измерат крвен притисок, гликемија, пикфлоуметрија и да ги слушнат насоките од семејните лекари. Од претседателот на ЗЛОМ-СМ дознавме и дека била измерена гликемија, 13, кај помладо момче, инаку спортист-тенисер, кој застанал на случајна проверка на шеќер во крвта и веднаш добил препорака да го посети својот матичен лекар.
„Доволно е на 6 месеци да се направи комплетна лабораторија, секој пациент да си го посети својот матичен лекар, да измери притисок, гликемија и да направи комплетна лабораторија врз основа на некој показател“, апелира д-р Ѓорѓиевски. „Некако сме навикнати пациентот да доаѓа на лекар само во тешки состојби или во екстремно лесни состојби. На пример, се боцнал на игла од чадор па го посетил матичниот лекар, а немал никаква потреба за да посети матичен лекар, или во една екстремна состојба каде што се гуши, со температура од десет дена, со тешка пневмонија, чекал да му помине. Така што при превентивните прегледи, пред се, за дијабетот, забележуваме дека е зголемен бројот на дијабетичари кај средната и помладата популација во постковидниот период, од 2022 година па наваму има еден тренд кој се бележи и во светски рамки.“
Светскиот ден на семејниот лекар се одбележува на 19-ти мај секоја година. Овој ден е инициран од Светската организација на семејните лекари (WONCA) во 2010 година со цел да се истакне значајната улога на семејните лекари во здравствениот систем и да се подигне свесноста за нивната работа и придонес.
„Од неговото прогласување од WONCA во 2010 година, Светскиот ден на семејниот лекар стана годишна прослава која ја препознава централната улога на семејните лекари во обезбедувањето лична, сеопфатна и континуирана здравствена заштита на пациентите. Овој ден е одлична можност да се признае и да се цени напредокот постигнат во семејната медицина и исклучителниот придонес на тимовите за примарна здравствена заштита на глобално ниво“, се вели на веб-страницата на WONCA.
Семејните лекари играат суштинска улога во превенцијата, дијагностиката, третманот и управувањето со хронични и акутни заболувања, обезбедувајќи континуирана и сеопфатна грижа за своите пациенти. Тие се првата точка на контакт за многу луѓе во здравствениот систем и често одржуваат долгорочни односи со пациентите и нивните семејства.
Светскиот ден на семејниот лекар се одбележува со различни активности ширум светот, вклучувајќи образовни кампањи, конференции, семинари и медиумски настапи за промоција на важноста на семејната медицина.
