-
На Лукас му бил дијагностициран редок тумор на мозокот (DIPG) на возраст од шест години
-
Тој е единственото дете чиј тумор целосно исчезнал во клиничкото испитување
Тринаесетгодишно момче од Белгија стана првото во светот излечено од смртоносен рак на мозокот.
Кога на Лукас на шестгодишна возраст му бил дијагностициран редок облик на тумор на мозокот, немало сомнеж за прогнозата. Францускиот лекар Жак Грил и денес покажува колку му е тешко кога ќе се сети дека морал да им каже на родителите на Лукас дека нивниот син ќе умре.
„Туморот на Лукас имаше исклучително ретка мутација која, веруваме, ги направи неговите клетки почувствителни на лекот“, рече д-р Жак Грил, раководител на програмата за тумор на мозокот во Центарот за рак „Густав Руси“ во Париз
Меѓутоа, седум години подоцна, Лукас има 13 години, а од туморот веќе нема траги.
Момчето од Белгија е првото дете во светот што е излечено од глиома на мозочното стебло, еден од најбрзо растечките тумори на мозокот, според неговите лекари.
„Лукас ги победи сите изгледи за преживување“, рече д-р Жак Грил, раководител на програмата за тумор на мозокот во Центарот за рак „Густав Руси“ во Париз.
Туморот, чие полно име е дифузен внатрешен понтински глиом (DIPG), е агресивен облик на тумор кој обично убива девет месеци по дијагнозата, а секоја година се дијагностицира кај околу 300 деца во САД и околу стотина во Франција. Сепак, прогнозата за децата со DIPG тумори останува лоша – повеќето не живеат ниту една година. Една неодамнешна студија покажа дека само 10 отсто од децата живеат уште две години.
Радиотерапијата понекогаш може да го забави ширењето на агресивниот тумор, но ниту еден лек не се покажал ефикасен против него, пишува Science Alert.
Нема друг случај како него
Лукас и неговото семејство отпатувале од Белгија во Франција за да се приклучи на експериментален третман за тестирање на потенцијално нови лекови за DIPG. Од самиот почеток, Лукас силно реагирал на лекот против рак еверолимус (Афинитор), кој му бил доделен по случаен избор.
„За време на низа магнетни резонанци, гледав како туморот целосно исчезнува“, изјави Грил за AFP.
Но, докторот не се осмелил да го прекине режимот на лекување, барем до пред година и пол кога Лукас открил дека и онака повеќе не ги зема лековите.
„Не знам за ниеден таков случај во светот“, изјави Грил.
Зошто точно Лукас целосно се опоравил и како неговиот случај може да им помогне на другите деца како него, останува да се види. Седумте преостанати деца во испитувањето преживеале години по дијагнозата, но само туморот на Лукас целосно исчезнал.
Д-р Жак Грил (на сликата) гледал како туморот на мозокот на Лукас целосно исчезнува
Причината зошто овие деца реагирале на лековите, додека другите не реагирале, веројатно е поврзана со биолошките особености на нивните поединечни тумори, рече Грил. „Туморот на Лукас имаше исклучително ретка мутација која, веруваме, ги направи неговите клетки почувствителни на лекот“, додаде тој.
Научниците сега ќе се обидат да ги репродуцираат ин витро разликите идентификувани во неговите клетки со цел да го откријат точниот метод со кој биле убиени клетките на ракот. Тие предупредија дека секој можен третман со широк спектар е сè уште далеку.
„Во просек, потребни се 10 до 15 години од првиот експеримент за нешто да стане лек, тоа е долг процес“, изјави Грил.
