Бактеријата Mycoplasma pneumoniae предизвикува два типа на респираторни инфекции: почеста настинка на градниот кош, трахеобронхитис, и поретка инфекција на белите дробови, попозната како „одечка пневмонија“. Иако се наоѓаме во сезона на респираторни заболувања, оваа бактерија може да се шири во текот на целата година.
„Одечката пневмонија“ на прв поглед може да има благи симптоми кои наликуваат на обична настинка, па луѓето обично продолжуваат со секојдневните активности, несвесно ширејќи ги бактериите. Важно е да се обрне внимание на нејзините суптилни симптоми.
Симптомите се појавуваат во рок од една до четири недели по изложувањето и може да траат неколку недели
Пневмонијата, која може да биде бактериска, вирусна, габична или паразитска, доаѓа во различни форми. „Одечката пневмонија“ се смета за атипична, според д-р Камил Сабела, педијатар за инфективни болести во Cleveland Clinic Children’s.
„Одечката пневмонија може да биде различна. Таа обично не е стандардна бактериска пневмонија. Најчесто ја предизвикува бактеријата Mycoplasma pneumoniae, но исто така може да биде многу слична на вирусните пневмонии,“ изјави д-р Сабела коментирајќи го годинашниот пораст на случаи на оваа болест.
Вообичаен резултат на инфекцијата со микоплазма е пневмонија (понекогаш се нарекува „одечка пневмонија“ бидејќи обично е блага и ретко бара хоспитализација). Може да резултира и со инфекција на средното уво (отитис медиа). Симптомите може да траат од неколку дена до повеќе од еден месец
Како се шири болеста?
M. pneumoniae се пренесува преку капки, па покривањето на устата и носот при кашлање или кивање значително ја спречува заразата. Бидејќи не постои вакцина против „одечката пневмонија“, одржувањето добра хигиена, вклучувајќи редовно миење раце, е најдобриот начин за избегнување на болеста, велат од ЦДЦ.
Д-р Сабела препорачува малите деца да примат вакцина против пневмококната пневмонија, која ги штити од бактеријата Streptococcus pneumoniae, иако не ја спречува „одечката пневмонија“.
„Секое дете треба да биде вакцинирано. Почнуваме со вакцинирање уште рано во животот, и тоа функционира многу добро. Но, бидејќи пневмококната бактерија има толку многу различни соеви, не можеме да се заштитиме од секој сој со вакцината која моментално е достапна,“ изјави таа.
Инфекциите со M. pneumoniae може да се појават на која било возраст, но најчесто се јавуваат кај деца на возраст од 5-17 години и кај млади возрасни. Почетокот на симптомите обично е постепен и може да вклучува треска, кашлица и болки во грлото. Помалите деца, исто така, може да имаат симптоми како што се дијареја, отежнато дишење или повраќање
Симптоми на „одечка пневмонија“
M. pneumoniae може да ја оштети слузокожата на белите дробови, грлото и душникот. Симптомите се појавуваат во рок од една до четири недели по изложувањето и може да траат неколку недели.
Кај деца помлади од 5 години:
- Дијареја;
- Кивање;
- Болка во грлото;
- Затнат нос или течење на носот;
- Повраќање;
- Солзење на очите;
- Потешкотии при дишење.
Кај деца над 5 години:
- Чувство на замор;
- Треска;
- Главоболка;
- Кашлица која постепено се влошува;
- Болка во грлото;
- Болка во градите;
- Отежнато дишење.
Без оглед на видот на инфекција со бактеријата M. pneumoniae, побарајте итна медицинска помош доколку вие или детето кое го згрижувате имате потешкотии при дишењето или симптоми кои се постојани или се влошуваат.
