ПИШУВА:
Катерина Шекеровска-Димовска
katerina@pedijatar.mk
Во преполна сала и исклучително позитивна атмосфера, денес и официјално беше отворен Четвртиот симпозиум „Аптекарска здравствена заштита – Процес на управување со терапија (МТМ) кај хипертензија, дислипидемија и обезност“ – Смарт Фармацевт модул 4, кој се одржува на 14 и 15 ноември во хотелот „Хилтон“ во Скопје.
„Денешниот симпозиум не е само уште еден настан во низата, тоа е континуитет, еволуција и созревање на една идеја. Идеја дека фармацевтот не е само дел од ланецот на дистрибуција, туку активен, компетентен и доверлив здравствен професионалец, кој има суштинска улога во унапредување на здравјето на населението“, истакна м-р фарм. Џоана Андоноска, претседател на Здружението на приватни аптеки на РС Македонија (ЗПАРСМ), во својот поздравен говор пред присутните.
Таа додаде дека е особена чест што годинава присуствуваат двајца врвни светски експерти, кои меѓу другото се креатори и автори на концептот „Смарт фармацевт“: г-ѓа Аријана Мештровиќ, Pharma Expert и носител на концептот „Смарт фармацевт“ во Македонија и г. Мајкл Раус, светски лидер во областа на фармацевтската едукација и развој на професионалните компетенции.
Денес, фармацевтската професија се соочува со нови предизвици: дигитализација, интеграција на податоци, нови терапии, индивидуализиран пристап, но пред сè, соочена е со потребата да се слушне нејзиниот глас во здравствениот систем. Нашата заложба е јасна: да ја покажеме вистинската вредност на фармацевтската грижа и услуга како инвестиција во здравјето на пациентите и вистинската вредност на фармацевтот, кој е советник, едукатор, чувар на рационалната употреба на лекови и безбедноста на пациентот, а не само издавач на терапија
М-р фарм. Андоноска потенцираше дека проектот „Смарт фармацевт“ го започнале со јасна визија – да ја постават аптеката како активен и стратешки здравствен пункт, а фармацевтот како професионалец, кој преку знаење, анализа и советување создава реална вредност во грижата на пациентите.
„Денес, фармацевтската професија се соочува со нови предизвици: дигитализација, интеграција на податоци, нови терапии, индивидуализиран пристап, но пред сè, соочена е со потребата да се слушне нејзиниот глас во здравствениот систем. Нашата заложба е јасна: да ја покажеме вистинската вредност на фармацевтската грижа и услуга како инвестиција во здравјето на пациентите и вистинската вредност на фармацевтот, кој е советник, едукатор, чувар на рационалната употреба на лекови и безбедноста на пациентот, а не само издавач на терапија“, нагласи м-р фарм. Андоноска.
Денешниот симпозиум не е само уште еден настан во низата, тоа е континуитет, еволуција и созревање на една идеја. Идеја дека фармацевтот не е само дел од ланецот на дистрибуција, туку активен, компетентен и доверлив здравствен професионалец, кој има суштинска улога во унапредување на здравјето на населението
Во контекст на напредокот на фармацијата во Македонија, вчера беше потпишан и Меморандум за соработка меѓу Aмериканската асоцијација на фармацевти (АPhA), Фармацевтската комора и Здружението на приватни аптеки, што отвора ново поглавје за меѓусебна соработка, размена на искуства и знаења, можност за заеднички проекти во во насока на развој и унапредување на фармацевтската практика.
Фармацевтската фела, обединета на едно место, во хотелот “Хилтон“, со голема желба за практични знаења, алатки, инспирација и усовршување – на отворањето ги поздрави и главните предавачи: Аријана Мештровиќ (Pharma Expert) и Мајкл Раус (American Pharmacist Association – APhA), кои денес и утре ќе ги споделат најновите трендови и добри практики во процесот на управување со терапијата (МТМ). Тие имаа свое обраќање до присутните, а на отворањето, покрај претседателката на ЗПАРСМ, се обрати и претседателката на Фармацевтската комора, Весна Ставрова, директорот на МАЛМЕД, Сабри Алити, Билјана Божиновска од Здружението на приватни аптеки, којашто ги презентираше резултатите од кампањите за дијабетес и дебелина, како и д-р Сашка Јаневска, со презентација на проекти на ЗПАРСМ со Центарот за семејна медицина.
Во текот на денешниот и утрешниот работен ден на Симпозиумот ќе бидат опфатени повеќе аспeкти:
- Улогата на фармацевтот во јавно здравство – трендови во пракса.
- Нови трендови и добри практики во едукацијата, специјализацијата и клиничката имплементација на MTM моделите.
- МТМ модел на Американската фармацевтска асоцијација (APhA)
- Управување со терапија – клинички аспекти, одлуки во процесот на МТМ во случаи од пракса кај хипертензија, дислипидемија, обезност – 10 сложени случаи од пракса.
- SWOT – анализа и бизнис план МТМ.
- Управување со промени во МТМ.
- Улогата на болничките фармацевти – глобален преглед.
- Интегриран и мултидисциплинарен пристап – соработка со матични лекари, специјалисти и други здравствени работници.
Четвртиот симпозиум „Аптекарска здравствена заштита – Процес на управување со терапија (МТМ) кај хипертензија, дислипидемија и обезност“ – Смарт Фармацевт модул 4 ќе заврши утре со Панел-дискусија на тема „Интеграција на фармацевтите во здравствениот тим“.
